जेलमै रहेका JDU का बाहुबली नेता अनन्त सिँह उर्फ 'छोटे सरकार' २९ हजार बढी मतले विजयी

न्यूज ब्यूरो । निर्वाचनअघि धेरै विवादमा रहेको मोकामा निर्वाचन क्षेत्रबाट JDU बाहुबली अनन्त सिंह विजयी भएका छन्।
उनले आफ्ना निकटतम प्रतिस्पर्धी वीणा देवीलाई पराजित गरेका छन्। वीणा देवी पूर्व सांसद तथा बाहुबली सुरजभान सिंहकी पत्नी हुन्। आरजेडीबाट उनलाई टिकट दिइएको थियो। यो क्षेत्रमा २५ चरणमा मतगणना सम्पन्न भयो। अनन्त सिंह २९,७१० मतले विजयी भए।

मोकामाबाट अनन्त सिंहको छैटौँ जित

अनन्त सिंहले मोकामा क्षेत्रबाट जितको नयाँ रेकर्ड बनाइरहेका छन्। उनको यो छैटौँ विजय हो। यसपालि मोकामा क्षेत्र निकै चर्चामा रह्यो, किनकि यहाँ त्रिकोणात्मक प्रतिस्पर्धाको सम्भावना देखिएको थियो। लगातार पाँच पटक विधायक भइसकेका अनन्त सिंहको प्रतिस्पर्धा आरजेडीकै बाहुबली सुरजभान सिंहकी पत्नी वीणा देवी र जन सुराज पार्टीका पीयूष प्रियदर्शीसँग थियो।

…र जेल गए अनन्त सिंह

पीयूष जातीय समीकरणमा धानुक समुदायबाट आएका हुन् र आफ्नो समुदायका भोट एकताबद्ध गर्न उनले ठूलो प्रयास गरेका थिए। तर चुनाव प्रचारका क्रममा पीयूष र अनन्त सिंहको काफिला आमनेसामने हुँदा विवाद उत्पन्न भयो। दुवै पक्षबीच हाताहात, ढुंगा प्रहार तथा गोली काण्डसम्म भयो। यस घटनामा जन सुराजका समर्थक दुलारचन्द्र यादवको मृत्यु भयो। यस घटनाका आधारमा दर्ता गरिएको एफआईआरपछि अनन्त सिंहलाई न्यायिक हिरासतमा पठाइयो र हाल उनी जेलमै छन्। यद्यपि मोकामाका जनताले उनलाई फेरि जितको आशीर्वाद दिएका छन्।

मोकामा क्षेत्रमा कहिले कसले जित्यो?

मोकामा विधानसभा क्षेत्र १९९० देखि लगातार बाहुबली नेताहरूको कब्जामा छ।

१९९० र १९९५ मा अनन्त सिंहका ठूला दाजु दिलीप सिंह लालू यादवसँग रहेर जनता दलबाट विजयी बने र मन्त्रीसमेत बने।

सन् २००० मा सुरजभान सिंहले दिलीप सिंहलाई पराजित गरेर जित हात पारे।

२००५ मा अनन्त सिंह जेडीयूको टिकटमा चुनाव लडेर सुरजभान सिंहलाई हराउँदै पहिलो पटक विधायक बने।

२००५ मा सरकार बन्न नसकेपछि राष्ट्रपति शासन लाग्यो र सोही वर्षको अक्टोबर–नोभेम्बरमा फेरि चुनाव भयो, जहाँ अनन्त सिंह दोस्रो पटक विजयी भए।
२०१० मा पनि उनी जेडीयूको टिकटमै जिते।  तर २०१५ मा नीतीश सरकार उनीविरुद्ध भएपछि उनी स्वतन्त्र उम्मेदवारको रूपमा चुनाव लडे र विजयी भए।
२०२० मा आरजेडीका टिकटमा चुनाव लडेर अनन्त सिंह पाँचौँ पटक विधायक बने। उनले जेडीयूका उम्मेदवार राजीव लोचन सिंहलाई ३५,७५७ मतले पराजित गरेका थिए।
२०२० मा अनन्त सिंहले ७८,७२१ मत पाएका थिए भने जेडीयूका राजीव लोचन सिंहले ४२,९६४ मत पाए।

२०२२ को सजा, पत्नीको जीत र २०२५ को वापसी

२०२२ मा अदालतले अनन्त सिंहलाई सजाय सुनाएपछि उनको सदस्यता खोसियो। त्यसपछि आरजेडीको टिकटमा उनकी पत्नी नीलम देवी उपचुनावमा उम्मेदवार बनिन् र विजयी भइन्।
२०२५ को फ्लोर टेस्टका क्रममा नीलम देवी एनडीएको पक्षमा गइन्।
यसपटक अनन्त सिंह अदालतबाट बरी भएपछि पुनः २०२५ मा जेडीयूको टिकटमा चुनावी मैदानमा उत्रेका थिए।