प्रदेश २: सवारी कर वृद्धि उपर अर्थमन्त्री यादवले खोले मुख , न्यूजब्यूरोसँग भने यस्तो...?

न्यूज ब्यूरो |

जनकपुरधाम, ४ साउन । प्रदेश २ मा सवारी साधनहरुमा कर वृद्धि भएको भनी आएको भ्रामक समाचारहरुप्रति प्रदेश २ सरकारको गम्भीर ध्यानाकर्षण भएको छ ।

प्रदेश नं. २ को आर्थिक ऐन २०७५ मा सवारी साधन करका दरहरु वृद्धि गरिएको भनी समाजिक संजाल तथा विभिन्न सञ्चार माध्यममा प्रकाशित समाचारहरुप्रति प्रदेश २ को आर्थिक मामिला तथा योजना मन्त्रालयको ध्यानाकर्षण भएको हो ।

प्रदेश आर्थिक ऐन २०७५ ले चालु आर्थिक वर्ष २०७५/७६ का लागि सवारी साधनमा लाग्ने करका दरहरुमा प्रदेश सरकारले वृद्धि गरेको भनी विभिन्न छापा तथा विद्युतीय संचार माध्यम र समाजिक संजालहरुमा आएको समाचारबाट प्रदेशबासीमा भ्रम सिर्जना भइरहँदा आर्थिक मामिला तथा योजना मन्त्रालयले शुक्रवार एक विज्ञप्ति जारी गर्दै सर्वसाधारको भ्रम चिरेका हुन् ।

संघिय आर्थिक ऐन २०७४ बमोजिम साबिकका विभिन्न प्रकारका सवारी साधनहरुमा लागि आएको सवारी साधन करका दरहरुमा परिर्वतन नभएको र मात्र भाडाको ट्याकटरमा वार्षिक कर दर रु. २५०० बाट रु. ४००० पुर्याइएको विज्ञप्तिमा उल्लेख रहेको छ ।

यता, आर्थिक मामिला तथा योजना मन्त्री बिजय कुमार यादवले न्यूज ब्यूरोसँग कुरा गर्दै, “प्रदेश सरकारले कुनै त्यस्तो जनचाहना विपरित निर्णय गरेको छैन, न त गर्नेछ ।” मन्त्री यादवले प्रदेश सरकार प्रदेश नं. २ का जनताको चाहना र माग बमोजिम नै अघि बढ्ने बताउनुभयो ।