जनमत पार्टीबाट कारवाहीमा परेका नेताहरुले खोले 'जनस्वराज' पार्टी

न्यूज ब्यूुरो, जनकपुरधाम । डा. सिके राउत नेतृत्वको जनमत पार्टीबाट विभिन्न समयमा कारवाही भोगेका नेता कार्यकर्ताहरुले अलगै पार्टीको गठन गरेका छन् ।

जनमत पार्टीमा रहँदा पार्टीको आचारसंहिता विपरित गतिविधि गरेको, नैतिक मूल्य मान्यता विपरित कार्य गरेको, गैर समाजिक कार्य गरेको आरोपमा निलम्बमा परेका नेता कार्यकर्ताहरुले जनस्वराज नामक पार्टी गठन गरेका छन् ।

शनिबार जनकपुरमा डा. सञ्जयकुमार साहको अध्यक्षतामा दुई दिनसम्म चलेको बैठकबाट जनमत पार्टीका विद्रोही नेताहरूले ‘जनस्वराज’ नामक पार्टी गठन गरेका हुन् ।

समाजका लागि सामूहिक नेतृत्वमा पार्टी सञ्चालन गर्ने भएकाले पार्टी अध्यक्ष कसैलाई नबनाएको ई।दीपक साहले बताए । उनले भने, ‘पार्टी सञ्चालनका लागि विभिन्न विभागहरू गठन गर्छौँ, त्यो विभागको जिम्मेवारी दिएर पार्टी सञ्चालन गर्छौँ ।’ पार्टी गठनसँगै तीन वटा विभाग पनि बनाइएको छ ।

साहलाई राजनीतिक संगठन विभागको जिम्मेवारी दिइएको छ भने ई.सुरेन्द्रनारायण यादवलाई आर्थिक विभागको जिम्मेवारी दिइएको छ । त्यस्तै प्रशिक्षण विभागको जिम्मेवारी डा. सञ्जयकुमार साहलाई दिइएको छ ।

यसरी विभिन्न विभागमा जिम्मेवारी दिएर पार्टीका गतिविधिहरू बढाइने नेता दीपक साहले बताए । अन्य नेताहरूलाई पनि यसैगरी विभागीय जिम्मेवारी दिने तयारी भइरहेको उनले सुनाए ।

दीपक साह यसअघि जनमत पार्टीमा उपाध्यक्ष तथा अनुशासन समिति संयोजक थिए भने ई. यादव कोषाध्यक्ष थिए । दुवैलाई जनमत पार्टीले पार्टी नियम निष्ठा विपरित कार्य गरेको भन्दै पार्टीबाट निलम्बन गरेको थियो । निलम्बनको समयमा समेत आफ्नै अध्यक्षविरुद्ध बदनामीको शब्दहरु लेख्न थालेपछि उनीहरुलाई हटाएको थियो ।

जेनजी आन्दोलनपछि जनमतका उपाध्यक्ष अब्दुल खानको नेतृत्वमा केही नेताले विद्रोह गरेर पार्टी छाडेका थिए । हाल उनीहरू गठन भएको नयाँ पार्टीमा त छैनन् तर नयाँ पार्टीसँग निरन्तर कुराकानी भने भइरहेको नेता दीपक साहले जानकारी दिए ।

जनस्वराज पार्टीले व्यक्तिवाद नभई सामूहिक सहभागिता, राजनीति नभई, सेवा गर्ने प्रतिबद्धता, पद नभई, जिम्मेवारी र जवाफदेहिता, विभाजन नभई, एकता र समानताका लागि प्रतिबद्धता जनाएको छ ।