ढल्केवरको होटलमा युवतिको बार्गेनिँग, युवाहरुको छापामारी, यौनधन्दा गराउने सँचालक पक्राउ 

न्यूज ब्यूरो, २५ साउन । वेश्यावृति धन्दा चलाएको आरोपमा धनुषाको ढल्केवरस्थित रहेको मौसम होटलका सञ्चालक पक्राउ परेका छन् । खुलेयाम रुपमा वेश्यावृति धन्दा चलाएर ठाउँलाई बदनाम गराएको भन्दै स्थानीय सचेत युवाहरुले होटलमाथि निगरानी बढाएका थिए ।

बिहिबार राति करिब ९ बजेको समयमा ती युवाहरुले होटलमा छड्के हान्दा अवैध यौन क्रियाकलाप भइरहेको पाइएपछि प्रहरीलाई खबर गरेका थिए । प्रहरीलाई खबर गरेलगत्तै अवैध यौन क्रियाकलापमा संलग्नहरु भागेका थिए ।

आफूहरुको सूचना पाएर प्रहरीले नै त्यहाँबाट उनीहरुलाई भगाएको ती युवाहरुको आशंका छ । ‘प्रहरीले प्राय होटलहरुबाट महिनावारी पैसा असुल्छन् । प्रहरीहरु पैसा खाएपछि त्यस्तालाई पक्राउ गर्ने कुरै हुँदैन,’ नाम उल्लेख नगर्ने शर्तमा ती युवाले भने ‘यो ठाउँमा अति भइसकेको छ । स्थानीय प्रहरी प्रशासनको भूमिकामा चित्त बुझाउने ठाउँ छैन । हामी अब चुप लागेर बस्न सक्ने अवस्था छैन । धन्दामा लाग्नेहरुलाई लखेट्नुको विकल्प देख्दिन ।’

होटलमा छड्केमा पुगेका सचेत युवाहरुलाई देखेपछि होटल सञ्चालकले दररेट सुनाएको पाइएको छ । भिडियोमा होटल सञ्चालकले भनेका छन, ‘कस्तो चाहियो ? तपाईलाई जस्तो चाहिन्छ त्यस्तै हामीसँग छ । तीन हजारबाला छ, २५ सयको छ । जस्तो लिनुस् ।’ 

त्यसै भिडियोको आधारमा होटल सञ्चालकलाई पक्राउ गरेको इलाका प्रहरी कार्यालय ढल्केवरले जनाएको छ । प्रहरीका अनुसार अबैध धन्दाका लागि ग्राहकसँग मोलमोलाई गरेको भिडियो प्रमाण भेटिएपछि पक्राउ गरिएको हो । द पब्लिक टुडेमा समाचार प्रकशित छ ।

इलाका प्रहरी कार्यालय ढल्केवरका एक प्रहरी अधिकारीले भने ‘आज इन्सपेक्टर साब विदामा हुनुहुन्छ । भोली आउने कुरा छ । त्यसपछि के गर्ने नगर्ने भन्ने थाहा हुन्छ ।’

पछिल्लो समय ढल्केवर क्षेत्रका अधिकांश होटलहरूमा यौनजन्य क्रियाकलाप भइरहेको स्थानीयहरुले गुनासो गर्दै आएका छन् । उनीहरुले यस्ता गतिविधिले समाजमा गलत सन्देश फैलाएको भन्दै समयमै नियन्त्रण गर्न माग गर्दै आएका छन् । तर, यसमा प्रहरीप्रशासनको भूमिका शंकास्पद देखिएपछि युवाहरुले आफै सक्रियता बढाएका हुन् ।