बाबाधामस्थित बस र ट्रक ठोक्किँदा १८ कावँरियाको मृत्यू, कैयौँ घाईते !

न्यूज ब्यूरो, १३ साउन । झारखण्ड राज्यअन्तर्गत देवघर जिल्लाको मोहनपुरमा मंगलबार बिहान भएको बस र ट्रकको ठोक्कावटमा परी कम्तीमा १८ जना कावडियाको मृत्यु भएको छ भने २० जना घाइते भएका छन्। घटना बिहान करिब साढे ५ बजे गोड्डा–देवघर मुख्य मार्गस्थित मोहनपुर थाना क्षेत्र अन्तर्गत जमुनिया मोड नजिक भएको हो।

हादसा निकै भयावह रहेको स्थानीयहरूले बताएका छन्। बसका परखच्चा उडेका थिए भने घटनास्थलमा नै थुप्रैको ज्यान गएको थियो। जानकारी पाएलगत्तै मोहनपुर थाना प्रमुख प्रियरंजनसहितको प्रहरी टोली घटनास्थलमा पुगेको थियो। प्रहरी र स्थानीयवासीको सहयोगमा घाइतेहरूलाई एम्बुलेन्समार्फत मोहनपुर सामुदायिक स्वास्थ्य केन्द्र (CHC) लगिएको हो।

घटनास्थल पुगेका स्थानीयहरूले २० भन्दा बढी श्रद्धालु गम्भीर घाइते भएको दाबी गरेका छन्। दुर्घटनाको खबर सार्वजनिक भएसँगै स्थानिय जनप्रतिनिधिहरूले शोक व्यक्त गरेका छन्।

देवघर क्षेत्रका सांसद निशिकान्त दुबेले घटनाप्रति दुःख व्यक्त गर्दै भने, "मेरो लोकसभा क्षेत्र देवघरमा श्रावण महिनाको काँवर यात्राका क्रममा बस र ट्रक एकआपसमा ठोक्किँदा १८ जना श्रद्धालुहरूको मृत्यु भएको खबरले म अत्यन्त मर्माहित छु। बाबा बैद्यनाथले दिवंगत आत्माहरूलाई शान्ति र शोकाकुल परिवारलाई शक्ति प्रदान गरून्।"

तर झारखण्डका स्वास्थ्य मन्त्रीले भने घटनामा ६ जनाको मृत्यु भएको र २३ जना घाइते भएको जानकारी दिएका छन्। मन्त्रीले सामाजिक सञ्जालमार्फत लेखेका छन्, "देवघरको मोहनपुरमा काँवरियाहरू सवार बस दुर्घटनामा ६ जनाको मृत्यु र २३ जनाको घाइते भएको पुष्टि भएको छ। मैले सम्बन्धित प्रशासनलाई तिव्र राहत र उपचार कार्य गर्न निर्देशन दिएको छु। गम्भीर अवस्थाका घाइतेलाई उच्च केन्द्रमा रेफर गर्ने व्यवस्था गर्न भनिएको छ।"

झारखण्डका मुख्यमन्त्री हेमन्त सोरेनले पनि घटनाप्रति दुःख व्यक्त गरेका छन्। उनले भनेका छन्, "आज बिहान देवघर जिल्लाको मोहनपुर प्रखण्डअन्तर्गत जमुनिया चौक नजिक भएको बस दुर्घटनामा श्रद्धालुहरूको मृत्यु भएको दुःखद खबरले मलाई स्तब्ध बनाएको छ। मृतकप्रति श्रद्धाञ्जली अर्पण गर्दै शोकाकुल परिवारलाई धैर्य धारण गर्ने शक्ति मिलोस्। घाइतेहरूको उपचारका लागि जिल्ला प्रशासनमार्फत आवश्यक सबै व्यवस्था मिलाइएको छ।"

देवघर, जसलाई बैद्यनाथधाम पनि भनिन्छ, श्रावण महिनामा शिवभक्तहरूको प्रमुख गन्तव्य मानिन्छ। प्रत्येक वर्ष लाखौं श्रद्धालु गंगाजल लिएर भगवान शिवको पूजा गर्न यहाँ आइपुग्छन्। देवघरलाई देवताको बासस्थान मानिन्छ।

स्थानीय प्रशासनले दुर्घटनाका कारणबारे अनुसन्धान थालेको छ। प्रहरीका अनुसार बस रातभरी यात्रा गरेर श्रद्धालुहरूलाई लिएर बैद्यनाथधामतर्फ जाँदै थियो, तर जमुनिया मोडमा ट्रकसँग ठोक्किँदा ठूलो क्षति भएको हो। दुर्घटनापछि केही समय यातायात अवरुद्ध भएको थियो।