भारतको इतिहासको सबभन्दा ठुलो प्लेन दुर्घटना, मृतकको सँख्या २६९ पुग्यो !

न्यूजब्यूरो, अहमदावाद — अहमदावादमा भएको एयर इन्डिया विमान दुर्घटनामा हालसम्म कुल २६९ जनाको मृत्यु पुष्टि भएको छ। मृत्यु हुनेमध्ये २४१ जना विमानमा सवार यात्रु तथा चालक दलका सदस्य रहेका छन् भने भुइँमा रहेका कम्तिमा २८ जना स्थानीय बासिन्दा र विद्यार्थीहरूको ज्यान गएको पुष्टि भएको छ।

दुर्घटना बिहीबार (जुन १२) दिउँसो करिब १:३८ बजे भएको हो। एयर इन्डियाको अन्तर्राष्ट्रिय उडान AI-171, जो बोइङ 787-8 ड्रीमलाइनर विमान हो, अहमदावाद विमानस्थलबाट लण्डनतर्फ उडेको केही समयमै प्राविधिक गडबडीका कारण B.J. मेडिकल कलेजको छात्रावास नजिकैको आवासीय क्षेत्रमा खसेको थियो।

विमानमा रहेका २४२ जना यात्रु तथा चालक दलमध्ये केवल एक जना, बेलायतका ३४ वर्षीय ब्रिटिश–भारतीय नागरिक विष्वश कुमार रमेश मात्र जीवित भेटिएका छन्। उनको अहिले गम्भीर अवस्थामै उपचार भइरहेको छ।

दुर्घटनामा परी भुइँमा रहेका घर तथा छात्रावासका बासिन्दा पनि मारिएका छन्। प्रारम्भिक जानकारीअनुसार, बम विस्फोट जस्तै ठूलो आवाजसहित विमान जमिनमा ठोक्किएर विस्फोट भएको थियो। विस्फोटपछि आगलागीले ठूलो क्षति पुर्याएको हो।

राहत तथा उद्धार कार्यका लागि राष्ट्रिय विपद् प्रतिक्रिया बल (NDRF), भारतीय वायुसेना, र स्थानीय प्रशासनको टोली परिचालन गरिएको छ। अधिकांश शवहरू जलेको अवस्थामा फेला परेकाले डीएनए परीक्षणमार्फत पहिचान गर्ने काम भइरहेको छ।

भारतको विमान दुर्घटना अनुसन्धान ब्युरो (AAIB) को नेतृत्वमा दुर्घटनाको छानबिन सुरु गरिएको छ। बोइङ कम्पनीका विशेषज्ञसहित अमेरिकी र बेलायती प्रविधिक टोलीहरू पनि अनुसन्धानमा सहभागी भएका छन्। घटनास्थलबाट ब्ल्याक बक्सहरू संकलन भइसकेका छन् र त्यसको विश्लेषणपछि दुर्घटनाको वास्तविक कारण खुल्ने अपेक्षा गरिएको छ।

प्रधानमन्त्री नरेन्द्र मोदी, भारतीय राष्ट्रपति द्रौपदी मुर्मु, बेलायतका प्रधानमन्त्री र अमेरिका लगायतका विश्व नेताहरूले मृतकप्रति श्रद्धाञ्जली अर्पण गर्दै शोक व्यक्त गरेका छन्।

यो दुर्घटना भारतको इतिहासमै सबैभन्दा ठुलो हवाई दुर्घटनाको रूपमा दरिएको छ। नागरिक उड्डयन मन्त्रालयले घटनाको गम्भीरता बुझेको बताउँदै, पीडित परिवारलाई सहायताका लागि विशेष राहत प्याकेज घोषणा गर्ने तयारी गरिरहेको छ।

घटनाको थप अनुसन्धान जारी छ। मृतक र घाइतेहरूको सूची सार्वजनिक गर्ने कार्य क्रमशः भइरहेको छ।