भारतको जम्मु कश्मिरमा धर्म सोधेर आतंकवादीले हाने गोली, दुई नेपालीसहित २० पर्यटकको मृत्यू

न्यूज ब्यूरो, जनकपुरधाम । भारतको जम्मु–कश्मिरको पहलगाममा पर्यटकमाथि आतंकवादी हमला भएको छ । हमलामा २० बढी पर्यटकको ज्यान गएको छ । थुप्रै घाइते भएका छन् ।

भारतीय अधिकारीहरूका अनुसार बन्दुकधारीहरूले गोली प्रहार गरेर पर्यटकहरूको हत्या गरेका हुन् । पर्यटकहरुलाई धर्म सोधेर गोली मारेको पीडित पर्यटकहरुले बयान दिएका छन् । उनीहरु हिन्दु भएपछि गोली मारेको बताईएको छ ।

सो आतंकी हमलामा नेपालका संदीप न्यौपाने र वितन अधिकारीसहित २० बढी पर्यटकको हत्या गरिएको छ । कैर्यौँ जना घाईते समेत भएका छन् । नामावली हेर्नुहोस्

जम्मु–कश्मिरका मुख्यमन्त्री उमर अब्दुल्लाहले यो आक्रमणलाई पछिल्ला वर्षमा आम नागरिकमाथि भएको ठूलो हमला भनेका छन् ।

भारतीय सञ्चारमाध्यमहरूका अनुसार केही घाइतेलाई उपचारका लागि अनन्तनागमा रहेको सरकारी मेडिकल कलेजमा भर्ना गरिएको छ ।

जम्मु–कश्मिरका स्वास्थ्यमन्त्री सकिना इटुका अनुसार अस्पतालमा भर्ना गरिएकामध्ये एकको अवस्था गम्भीर रहेको छ ।

जम्मु–कश्मिर घाटीमा पर्यटकहरूको आगमन हुने मुख्य सिजनमा आतंकवादीहरूले आक्रमण गरेका हुन् । पहलगाम पर्यटकहरूका लागि लोकप्रिय मानिन्छ । पहलगाममा हरियाली घाँसे मैदान र नीला तालमा रमाउन यहाँ प्रत्येक वर्ष थुप्रै पर्यटक भिजिट गर्छन् ।

प्रधानमन्त्री नरेन्द्र मोदीले यसलाई आतंकवादी हमला भनेका छन् । उनले हमलामा संलग्नलाई सरकारले नछाड्ने उनको भनाइ छ ।

जम्मु–कश्मिरका मुख्यमंत्री उमर अब्दुल्लाहले घटनापछि दुःख व्यक्त गरेका छन् । सामाजिक सञ्जालमा उनले लेखेका छन्, ‘म स्तब्ध छु, आगन्तुकहरूमाथि भएको यो आक्रमण अत्यन्त निन्दनीय छ ।’