धनुषाका सिडिओले जलाद पूल निर्माणको लागि गराएको सम्झौता कागजमै, पूल निर्माण नहुँदा मार्कामा जनता

न्यूज ब्यूरो, जनकपुरधाम । धनुषाको महेन्द्रनगरदेखि धनुषाधाम जाने परिक्रमा सडकमा निर्माणधीन अवस्थामा रहेको जलाद पूल अझै निर्माण हुन नसक्दा स्थानीय जनताहरु अहिलेदेखि नै सास्ती महसुस गर्न थालेका छन् ।

क्षीरेश्वरनाथ नगरपालिकाको सदरमुकाम महेन्द्रनगर जोडने क्षीरेश्वरनाथ नगरपालिका वडा नम्बर ७ र वडा नं. ९ ईच्छापुर जोडने परिक्रमा सडकको जलाद पुल निर्माणको लागि गत भदौमा धनुषाका प्रमुख जिल्ला अधिकारी रामुराज कडरियाको अगुवाईमा सम्झौता भएपनि त्यो कागजसम्म मात्र सिमित रहेको छ ।

गत भदौ १३ गते प्रमुख जिल्ला अधिकार कडरियासहित क्षीरेश्वरनाथ नगरपालिका वडा नम्बर ८ का वडाध्यक्ष, वडा नं. ९ का वडाध्यक्ष, वडा नं. ७ का वडाध्यक्षसहित विभिन्न निकायका व्यक्तिहरुको रोहबरमा ठेकेदारले अर्को स्पान निर्माणको लागि प्रक्रिया अगाडी बढाउनुपर्ने सम्झौता भएपनि ठेकेदारले अझै टेरेका छैनन् ।

धनुषा निर्वाचन क्षेत्र नं. ४ का प्रतिनीधिसभा सदस्य एवम् पूर्वमन्त्री रघुवीर महासेठको क्षेत्र रहेको सो पूल निर्माणको लागि बर्षौ लागेपनि महासेठले अझै पहल गर्न सकेका छैनन् ।

केन्द्रमा एमाले नेतृत्वको सरकार रहेको छ । क्षीरेश्वरनाथ नगरपालिका पनि एमाले नेतृत्वको स्थानीय सरकार रहेको छ । यद्यपी, पुल निर्माणको लागि थप कुनै प्रक्रिया अगाडी बढेका छैनन् ।

स्थानीयहरुले अब सीधा मधेश प्रदेशका मुख्यमन्त्री सतिश कुमार सिँहलाई भेटेर कारवाही प्रक्रिया अगाडी बढाउन दबाब दिने चेतावनी दिएका छन् । २०८१ भदौ १३ गते भएको सम्झौतामा अर्को स्पान निर्माण गर्न दिएको एक महिनाको समयमा एक बर्ष भएपनि निर्माण गर्न सकेका छैनन् । पुलमा दुई स्पान निर्माण गरिए सम्पन्न हुने बताईएको छ ।