सुकुम्बासीको जग्गा हडपेर बेच्नको लागि भूमि अध्यादेश ल्याइयोः अध्यक्ष यादव

न्यूज ब्यूरो, जनकपुरधाम । जनता समाजवादी पार्टी (जसपा) नेपालका अध्यक्ष उपेन्द्र यादवले सुकुम्वासीको नाममा राज्यको जग्गा हडेपेर बिक्री–वितरणका लागि भूमिसम्बन्धी अध्यादेश ल्याइएको दाबी गरेका छन् ।

पार्टीनिकट बौद्धिक पेशाकर्मी महासंघले शुक्रबार आयोजना गरेको ‘भूमिसम्बन्धी अध्यादेश’ विषयक अन्तरक्रियामा उनले यस्तो दाबी गरेका हुन् ।

‘सुकुम्वासीको नाममा भूमाफिया, बिचौलियाहरू, रियल स्टेटहरूले सुकुम्वासीको नाममा राज्यको महत्त्वपूर्ण जग्गा हडप्ने र त्यसलाई बिक्री वितरण गर्ने अनि बसोबास गराउने यो धन्दा भएको मलाई लागेको छ,’ यादवले भने ।

उनले भूमिसम्बन्धी अध्यादेश ल्याएर मुलुकलाई मरूभूमिकरण गर्न खोजिएकोसमेत टिप्पणी गरे । ‘देशलाई मरूभूमिकरण गर्ने कानुन ल्याउने काम गरियो,’ यादवले भने, ‘यो अध्यादेश हिमालको हितमा पनि छैन, पहाडको हितमा पनि छैन र मधेसको हितमा पनि छैन । देशकै हितमा छैन ।’

अध्यक्ष यादवले सरकारलाई अध्यादेश फिर्ता लिन पनि आग्रह गर्दै सांसद खरिद गरेर संसदबाट पास गराउन खोजे जनतामाझ जाने पनि बताए ।

‘सरकारले यो अध्यादेश फिर्ता लिओस् । हैन सांसद खरिद बिक्री गरेर यो पास गराउँछ भने हामी जनताकोमा जान्छौँ,’ उनले भने, ‘जनआन्दोलनको बाटो पक्रन्छौँ । यो स्पष्ट भए हुन्छ ।