जनकपुरको राराब कलेजमा स्वीयू चुनावको ओधबाध

न्यूज ब्यूरो, जनकपुरधाम । निरन्तर विवादमै रहँदै आएको जनकपुरको राराब कलेजमा स्वतन्त्र विद्यार्थी युनियनको चुनाव लागेको छ ।

आगामी चैत्त ५ गते तोकिएको स्वीयू चुनावको लागि विभिन्न राजनीतिक दलसँग आवद्ध विद्यार्थी सँगठनहरुले प्रचार प्रसार तिव्र बनाएको छ । प्रचार प्रसारको क्रममा चुनावी माहौल देख्न थालिएको छ ।

केही दिन अगाडी मात्र चुनावी माहौल तातिएपछि दुई दलका शिक्षकबीच कुटाकुट भएको घटना बाहिरिएको छ । यता, विभिन्न दलका विद्यार्थीहरुले समेत चुनावी माहौल तताएका छन् । अहिले राराबमा नेपाली काँग्रेसको भातृ सँगठन नेविसंघको नेतृत्व रहेको छ ।

केही महिना अगाडी राजर्षि जनक विश्वविद्यालयको चुनावमा लोकतान्त्रि समाजवादी पार्टी (लोसपा) निकट लोविसंघले बाजी मारेका हुन् । राराबमा यसपाली लोविसंघको चर्चा अधिक रहेको छ ।

राराबमा माओवादी, जसपा नेपाल, एमाले लगायतका अन्य दलका विद्यार्थी नेताहरुले समेत तयारी थालेका छन् ।

चुनावको दोस्रो पटक रहेकोले पार्टीगत भन्दा व्यक्तिगत मतमा केही विद्यार्थी नेताहरु अग्रस्थानमा देखिएका छन् । पार्टीले टिकट दिए शतप्रतिशत जित्ने दाबी ठोक्ने विद्यार्थी नेताहरुले पार्टीले टिकट नदिए स्वतन्त्र उम्मेदवारीको समेत मनसाय बनाएका छन् । पार्टीले मोटो रकममा टिकट बेचे बागी उम्मेदवारीका तयारी समेत केही दलका विद्यार्थी नेताले तयारी गरेका छन् ।

जनकपुरमा विद्यार्थी नेताहरुको बिगबिगीसहित चुनावी माहौलमा ओधबाध देखिएको छ ।

रामस्वरुप रामसागर बहुमुखी क्याम्पस जनकपुरधाममा चैत ५ गते हुने स्वतन्त्र विद्यार्थी युनियनको चुनाबका लागि निर्वाचन समिति गठन गरिएको छ । १३ सदस्यीय निर्वाचन समितिमा निर्वाचन अधिकृत उपप्रध्यापक धीरेन्द्रकुमार यादवलाई बनाइएको छ ।

सदस्य सचिवमा उपप्रध्यापक गुलजार राउत, सदस्यमा उपप्रध्यापक दिलिपकुमार राय, उपप्रध्यापक ज्ञानेन्द्रकमार मल्लिक, प्राध्यापक डा. संजयकुमार, उपप्रध्यापक भरतलाल कर्ण, उपप्रध्यापक धीरेन्द्रकुमार यादव, उपप्रध्यापक डा. रामलखन साह, शिक्षण सहायक जगन्नथ चौधरी, निमित लेखा अधिकृत देवेन्द्रकुमार साह, मु.प्रा.स. (कर्मचारी संघ सभापति) रामबाबु कुशियैत, प्रा.स. ज्ञानेन्द्रलाल कर्ण, प्रा।स। दिप्पुकुमार राय रहेका छन् ।