विदेह नगरपालिकामा कर्मचारीहरुले लखेटे हाकिम

न्यूज ब्यूरो, जनकपुरधाम । धनुषाको विदेह नगरपालिकाका प्रमुख प्रशासकीय अधिकृत दीपेन्द्र कुमार साहलाई त्यहाँका कर्मचारीहरुले लखेटेका छन् ।

आईतबार हाजिर हुन दलबलसहित नगरपालिका छिर्न खोजेपछि त्यहाँ कार्यरत कर्मचारीहरुले उनलाई गेट नपुग्दै लेखेटेका हुन् ।

विदेह नगरपालिकाका नगर प्रमुख बेचन दाससँग टशन भएका अधिकृत साहलाई त्यहाँ कार्यरत कर्मचारीहरुले उनलाई कार्यालय प्रवेशमा रोक लगाएका छन् । “ईन्जिनीयर दीपेन्द्र कुमार साह फिर्ता जाउँ”, “भ्रष्ट हाकिम दीपेन्द्र साह फिर्ता जाउँ” जस्ता नारासहित कर्मचारीहरुले नै प्रवेश रोक लगाएका छन् ।

मोटो सुरक्षाबीच कार्यालय प्रवेश गर्न गएका हाकिम साहले नेता शैलीमा हात हल्लाएका थिए, तर कर्मचारीहरुले लखेटेपछि प्रहरी सुरक्षाबीच उनी त्यहाँबाट निस्केर भागेका हुन् ।

नगर प्रमुख दाससँगको झगडा भएपछि कर्मचारीहरु समेत नगर प्रमुखको पक्षमा उभिएका छन् । कर्मचारीहरुलाई समेत तथानाथ थर्काएको आरोप लागेका अधिकृत साहलाई कर्मचारीहरुले फिर्ता पठाएका छन् ।

फिल्मी शैलीमा कार्यालय प्रवेश गर्न खोजेका अधिकृत साहले कर्मचारीहरुले प्रवेश नदिएपछि उनी जमिन ढोगेर फिर्ता भएका थिए । अधिकृत साहले मेयरलाई बायकट्ट गर्न खोजेपछि विवाद उत्पन्न भएको हो ।