विदेह नगरपालिकामा अब बालविकासदेखि १२ कक्षासम्म निःशुल्क पढाई हुन्छः मेयर दास

न्यूज ब्यूरो, जनकपुरधाम । धनुषाको विदेह नगरपालिकाका नगर प्रमुख बेचन दासले कक्षा १२ सम्म निःशुल्क पढाई लागू गर्न निर्देशन दिएका छन् ।

विहिबार नगरपालिकाका नगर प्रमुख दासले प्रमुख प्रशासकीय अधिकृतलाई सो निर्णय कार्यन्वन गर्नको लागि निर्देशन दिएका छन् । प्रमुख प्रशासकीय अधिकृत दीपेन्द्र कुमार साहले एक सूचना जारी गर्दै नगरभित्र सँचालनमा रहेका समुदायिक विद्यालयहरुमा कक्षा १२ सम्म निःशुल्क अध्ययन अध्यापनको व्यवस्था गर्न विद्यालयहरुलाई निर्देशन दिएको हो ।

शिक्षा ऐन २०२८ को दफा १६ घ (१) , निःशुल्क शिक्षा सम्बन्धी ऐन २०७५ को नियम ६ र अनिवार्य तथा निःशुल्क शिक्षा सम्बन्धी नियमावली २०७७ को दफा ५ बमोजिम बालविकासदेखि कक्षा १२ सम्मको निःशुल्क शिक्षा घोषणा भएपनि विद्यालयहरुले शुल्क लिएर नामाँकन, अध्ययन अध्धापन गराईरहेको भन्दै मेयर दासले कार्यवाहक मेयर राधेश्याम गोईत मार्फत सो निर्देशन दिएका हुन् ।

मेयर दास आफैँ देश बाहिर रहेको अवस्थामा सोही ठाउँबाट यस्ता निर्णय कार्यन्वन गराउन निर्देशन दिएको जनाइएको छ ।

केही विद्यालयहरुले विद्यार्थीहरुबाट विभिन्न प्रकारले रकम असुली गरेको जनगुनासो बढेपछि प्रमुख प्रशासकीय अधिकृत साहको समन्वयमा सो निर्णय कार्यन्वनको लागि निर्देशन दिएको हो ।

समुदायिक विद्यालयमा निःशुल्क पठनपाठनको व्यवस्था गरे अनुसार ऐन बमोजिम लिनु नपर्ने शुल्क नलिन निर्देशन दिएको हो ।