जनकपुरको राममन्दिर प्राँगनमा भोलीदेखि 'जनकपुर साहित्य महोत्सव' हुँदै

न्यूज ब्यूरो, जनकपुरधाम । प्रत्येक बर्ष जनकपुरमा आयोजन हुँदै आएको जनकपुर साहित्य महोत्सवको छैटौँ सँस्करण भोलीदेखि सुरु हुने भएको छ ।

बैचारिक तर्क विर्तक र बहस सहितको बौद्विक गन्थनमन्थन सहितको उत्सव जनकपुर साहित्य महोत्सव २०८१ आयोजनाको सम्पुर्ण तयारी पुरा भएको आयोजकले जनाएको छ ।

नव मिथिला फाउन्डेसनको आयोजनामा हुने जनकपुर साहित्य महोत्सवमा साहित्यिक, सांस्कृतिक र समाजिक चेतनाका लागि १४ वटा प्यानल छलफल र ३ वटा एकल प्रवचन समेटिएको फाउन्डेसनका अध्यक्ष अमित साहले जानकारी दिए ।

फाउन्डेसनले महोत्सवको तयारीबारे मंगलबार आयोजना गरेको पत्रकार सम्मेलनमा अध्यक्ष साहले लेखक सीके लालले महोत्सवको उद्घाटनमा विद्वत् प्रवचन दिने जनाए । यस्तै, नेपाल विद्युत् प्राधिकरणका महाप्रबन्धक कुलमान घिसिङले ’उज्यालोको यात्रा’, भारतीयका लेखक सुवोधचन्द्र भारतीयले ’सीता र रोटीबेटीको सम्बन्ध’ तथा खगेन्द्र संग्रौलाले ’आन्दोलन र साहित्य’ मा एकल प्रवचन दिनेछन् ।

’नेपालको परराष्ट्र नीति र सीमाञ्चल’ सत्रमा पत्रकार सुधीर शर्मा, लेखक तुलानारायण साह र इन्द्र अधिकारीसित पत्रकार अनिल गिरीले छलफल चलाउनेछन् । त्यस्तै ’नेपाली उद्यमीको यात्रा’मा उद्योगपति सौरभ ज्योति, माई सेकेन्ड टिचरका सुलभ बुढाथोकी र असीममान सिंहले आफ्नो धारणा राख्नेछन् । ’आनन्दको खोजी’ सत्रमा पत्रकार घनश्याम खड्कासित समा थापाले सहजीकरण गर्नेछिन् । साहित्य, शिक्षा, पर्यटन, नीति निर्माण, अर्थतन्त्र, सुशासन, राजनीति, खेलकुद, सम्पदा र संस्कारलगायतका विषयमा महोत्सवमा छलफल हुने फाउन्डेसनका उपाध्यक्ष आदित्य नेपालले जानकारी दिए ।

महोत्सवको उद्घाटनमा जनकपुरका १० विद्यालयका ६० जना विद्यार्थीले एकैसाथ जनकपुर सहरको एन्थम ‘इएह छी हमर जनकपुर’ गीतमा कोरस प्रस्तुति गर्नेछन् ।

कार्यक्रम जनकपुरको राम मन्दिर प्राँगनमा आयोजन भएको छ । यसको लागि आयोजक टीमले सबै तयारी पूरा गरिसकेको जनाएको छ ।