धनुषामा तीन पार्टीका पत्रकारहरुको चुनावी तालमेल, माओवादी-जसपा र कलम छापका पत्रकार एकै ठाउँमा

न्यूज ब्यूरो, जनकपुरधाम । शुक्रबार मँसिर २८ गते हुन लागेको विभिन्न राजनीतिक दल निकट पत्रकारहरुको छाता सँगठन नेपाल पत्रकार महासँघको चुनावमा धनुषा शाखामा तीन राजनीतिक दल निकट पत्रकारहरु एकता गरेका छन् ।

धनुषामा उपेन्द्र यादव नेतृत्वको जनता समाजवादी पार्टी (जसपा) नेपाल निकट प्रेस मँच, नेपाल कम्यूनिष्ट पार्टी माओवादी (केन्द्र) निकट प्रेस सेन्टर र एकिकृत समाजवादी पार्टी (नेकपा एस) निकट समाजवादी प्रेस सँगठनका पत्रकारहरु चुनावी तालमेल गरी प्यानल बनाएका छन् ।

यी तिनै राजनीतिक दल निकट संगठनका पत्रकारहरुले साँझा उम्मेदवार खडा गरेका छन् । बुधबार अपरान्ह विभिन्न दल निकटका पत्रकारहरुले उम्मेदवार खडा गरेको हो ।

तीन राजनीतिक दल निकटका पत्रकारहरुको सँगठनबाट माओवादी पार्टी निकट प्रेस संगठनबाट अध्यक्षमा नित्यानन्द मण्डल, जनता समाजवादी पार्टी (जसपा) नेपाल निकट प्रेस मँचबाट उपाध्यक्षको लागि सँजीव कुमार झा, माओवादी पार्टी निकट प्रेस सेन्टरबाटै महिला उपाध्यक्षमा नेहा झाले उम्मेदवारी दर्ता गराएको हो ।

जसपा नेपाल निकटकै प्रेस मँचबाट सहसचिवको लागि अर्जुन मण्डल, समावेशी तर्फ एकिकृत समाजवादी पार्टी निकट समाजवादी प्रेस संगठनबाट सहसचिवको लागि भोला यादव र प्रेस सेन्टरबाटै कोषाध्यक्षमा गोविन्द महतोले उम्मेदवारी दिएका हुन् ।

चुनाव अगाडी राजनीतिक पार्टीकै कार्यकर्ता झै लडदै, तालाबन्दी गर्दै, विरोध जनाउँदै आएका पार्टी निकटका पत्रकारहरुले चुनावमा राजनीतिक दलझैँ चुनावी तालमेल गरेका छन् ।

विभिन्न राजनीतिक पार्टीका पत्रकारहरु भएपछि धनुषासहित देशैभरी पत्रकारहरुबाट आम नागरिकको विश्वास उठन थालेको छ । पत्रकार स्वतन्त्र र निष्पक्ष हुनुपर्ने मान्यता छ ।