पत्रकारितामा निष्क्रीय रहेकाहरु प्रदेश समितिका उम्मेदवार, तीन जनामाथि उजुरी

न्यूज ब्यूरो, जनकपुरधाम । नेपाल पत्रकार महासंघको मँसिर २८ गते हुने निर्वाचनको लागि भएको मनोयन दर्तापछि मँगलबार दाबी विरोध गरिएको छ ।

सो क्रममा मधेश प्रदेश निर्वाचन समितिमा प्रदेश महासंघमा उम्मेदवारी दिएका तीन उम्मेदवारमाथि उजुरी परेको हो । मधेश प्रदेश निर्वाचन समितिले दिएको जानकारी अनुसार, राजन कुमार सिँह, राम हृदय यादव र अजय कुमार साहमाथि उजुरी परेको हो । यद्यपी, उजुरीमाथि कारवाही गर्दै उम्मेदवारहरुको उम्मेदवारी यथावत राखेको सूचना प्रकाशित गरेको छ ।

प्रेस युनियनबाट मधेश प्रदेश समितिको लागि महासचिवमा उम्मेदवारी दिएका राजन कुमार सिँह, सचिवमा उम्मेदवारी दिएका राम हृदय यादव र सदस्यमा उम्मेदवारी दिएका अजय कुमार साहमाथि उजुरी परेको निर्वाचन समितिका रामभरत साहले जानकारी दिए ।

उनीहरुमाथि परेको उजुरीलाई नेपाल पत्रकार महासँघको विद्यानको प्रक्रिया अनुसार उम्मेदवारी खारेजी नहुने बताउँदै उम्मेदवारी यथावत रहेको बताए ।

प्रेस युनियनबाट उम्मेदवारी दिएका राजन कुमार सिँह स्थायी शिक्षक हुन् । पूर्णकालिन विद्यालयमा अध्ययन अध्यापन गराउँदै आएका सिँहले सरकारी जागिरे र पूर्णकालिन सेवामा रहेकोले उम्मेदवार हुने नसक्ने भन्दै उजुरी परेको थियो । जानकारी अनुसार, सिँहले पढाउने विद्यालय, नगरपालिका र शिक्षा विकास समन्वय समितिबाट समेत कुनै अनुमति लिएका छैनन् । बिना अनुमति उम्मेदवार भए कानुन बमोजिम कारवाही हुने जानकारी दिइएको छ ।

यता, राम हृदय यादव समेत पत्रकारितामा पूर्ण रुपमा निष्क्रीय भई आफ्नै बोर्डिँग स्कूल सँचालक भएकोले महासंघको विधान अनुसार उम्मेदवार हुन नपाउने भन्दै दाबी विरोध गरिएको थियो । जनता समाजवादी पार्टी निकट रहेका यादव राजनीतिमा समेत सक्रिय हुँदै आएको व्यहोरासहित उजुरी परेको थियो । यद्यपी, नेपाल पत्रकार महासंघ धनुषा शाखामा सक्रिय पत्रकार भन्दा विभिन्न राजनीतिक दलका सक्रिय सदस्यहरु समेत रहेका छन् ।

अजय कुमार साहमाथि के कारणले उजुरी परेको खुलेको छैनन् ।