उठाइएको माग पुरा नभएसम्म सरकारमा सहभागी हुने छैनौ : राजेन्द्र महतो

कुलदिप दास |
जनकपुरधाम, ९ असार । राष्ट्रिय जनता पार्टी नेपालका अध्यक्ष मण्डलका सदस्य एवं धनुषा क्षेत्र नम्बर ३ बाट प्रतिनिधिसभा सदस्यमा निर्वाचित सांसद राजेन्द्र महतोले राजपाद्धारा उठाईएको माग सम्बोधन नभएसम्म आफुहरु सरकारमा कुनैपनि शर्तमा सहभागी नहुने जिकिर गरेका छन ।

धनुषाको मिथिला नगरपालिका वडा नम्बर–६ ढल्केवरमा शनिबार आयोजित पार्टी प्रवेश कार्यक्रममा बोल्दै उनले वर्तमान केपी ओली नेतृत्वको सरकारले राजपाका सांसद रेशम चौधरीलाई सपथ ग्रहण र प्रमाण पत्र वितरण नगरेकोप्रति आक्रोश पोखेका छन ।

उनले भने–जेलमा रहेका आफ्ना कार्यकर्ताको रिहाई र संविधान संशोधन नै हाम्रो मुल एजेण्डा हो । संविधान संशोधन नभएसम्म पार्टी सरकारमा जाँदैन ।

कार्यक्रममा बोल्दै पार्टीका महासचिव मनिष सुमनले संघीय समाजवादी फोरम नेपाललाई देश र प्रदेशमा राजपा भन्दा कम मत आएको दाबी गर्दै उसको आक्रमन्यतालाई स्वीकार नगर्ने जिकिर गरे ।

उनले समाज परिवर्तन गर्ने जिम्मा हामी सबैको काधँमा रहेको बताउँदै विभेदयुक्त यस समाजलाई लिङ्ग,जाती र क्षेत्रवासीको आधारमा विभेदमुक्त गराउनु हाम्रो जिममेवारी समेत बताए ।

राजपाका नगर संयोजक राम सुन्दर महतोको अध्यक्षतामा आयोजित कार्यक्रममा संघीय समाजबादीका केन्द्रिय सदस्य डा।सत्यनारायण सिंह र राप्रपाका नगर संयोजक दिलिप कुमार महतो सहित नेपाल कम्युनिष्ट पार्टी,नेपाली काँगे्रस,संघीय समाजबादी फोरम र राप्रपाका सैकडौँ कार्यकर्ताहरु पार्टी परित्याग गरी राजपामा प्रवेश गरेका छन् ।