सिरहाको गोलबजारमा लगायतार चोरी र डकैती हुँदै, प्रहरीलाई चुनौति

न्यूज ब्यूरो, जनकपुरधाम । सिरहाको मुख्य शहरमध्ये गोलबजारमा चोरी र डकैतीका घटनाहरुमा वृद्धि भएको छ । गोलबजारमा लगातार चोरी र डकैतीका घटनाहरु बढन थालेको छ ।

गत कार्तिक २८ गते राति गोलबजार वडा नम्बर ३ मुसहर्नियाका साधु यादवको घरमा भिषण चोरी भयो । चार जनाको समूहमा आएका चोरहरुले भित्ता फोरेर ( सुरुङ्ग खनेर) चोरी गरे । घरको भित्र पसेर गर गहना र नगद चोरी गरेको जनाइएको छ ।

मास्क (नकाब) लगाएर गएका चोरको समूहले यादवको घरमा चोरी गरेको यादवकी श्रीमति सिता यादवले बताईन् । चोरहरुले २ लाख नगद, चाँदीको कल्ली , सुनको मंगल सुत्र लगायतका गहनाहरु चोरेर लगेका छन् । घरभित्र छिरेर लुटपाट गर्ने क्रममा चोरहरुले यादव दम्पतिलाई कुटपिट पनि गरेका थिए ।

गोलबजार नगरपालिकामा शान्ति सुरक्षाको अवस्था नाजुक बन्दै गएको आरोप स्थानीय व्यापारीहरुको छ। स्थानीय जनता भय र त्रासमा छन् । उनीहरु रातभरी निदाउन सक्दैनन् । लागू पदार्थ दुव्र्यसनीहरुको समूह, चोर तथा डाका लगायतका आपराधिक झुण्ड टोल टोलमा रातभरी निसाचर झैं घुमिरहन्छन् ।

गोलबजारमा चोरी, डकैती, लुटपाटका घटनाहरु बाक्लै हुन थालेका छन् । चोर र डाँकाहरुको लागि चोरी डकैति गर्न सुगम स्थान बनेको छ गोलबजार नगरपालिका । तर प्रहरी भने मुकदर्शक बनेको छ । दर्जनौ लुटपाट तथा डकैतिको घटना हुँदा पनि प्रहरीले अपराधी पत्ता लगाउन सकेको छैन ।

गत कार्तिक ४ गते राति चोरहरुको लागि गोलबजार खेल मैदान जस्तै रहयो । उनीहरु रातभरी बिना कुनै डर र रोकटोकको वडा नम्बर ४ र ६ का विभिन्न घरहरुमा परेड खेलेर चोरी गर्न सफल भए । वडा नम्बर ४ स्थित नेपाल बैंक लिमिटेडको नवनिर्मित भवन पछाडि सुनील शर्मा ठाकुरको घरमा झ्याल फुटाएर पसेका चोरले अढाई तोला सुनका गर गहना र लत्ता कपडा चोरी लगेका छन् । शर्माको घरमा कोही मानिस नभएको मौका छोपेर चोरहरुले चोरी गरेका छन् ।

गोलबजारकै वडा नम्बर १३ मा गत असोज महिना भित्र ३ पटक चोरी र लुटपाटका घटना भएको थियो । डङग्राहा टोलमा मोहमद नथुनीको घरमा कालो रेनकोट लगाएर आएका १० जनाको एक आपराधिक समूहले लुटपाट गरेका थिए । त्यसैगरी सोही ठाउँ बस्ने विनोद साफीको घरमा पनि रहजनी डाका गरिएको थियो । डङग्राहाकै सिकिन कुमार साहको घर पनि लुटिएको थियो । त्यसको ३ दिन पछि विन्देश्वर महराको घरमा लुटपाट भएको थियो ।

गत असोज २७ गते आइतबार राति नाच हेर्न गएका डङग्राहाका २१ वर्षिय कृष्ण कुमार महराको हत्या भयो । धारिलो हतियार (सुइरो) घाँटीमा रोपेर हत्या गरिएको महराको शव आधा गाडिएको अवस्थामा फेला परेको थियो ।

वडा नम्बर १३ डङ्ग्राहाका बासिन्दाले प्रहरी समक्ष वाराम्वार सुरक्षा माग गरे पनि गोलबजार प्रहरीले चासो नदिएको उनीहरुको गुनासो छ । दिनदहाडै चोरी र डकैति र हत्याको आपराधिक वारदात निरन्तर बढ्न थालेपछि डरले डङ्ग्राहाबासी भयभियत छन् । उनीहरु शान्तिपूर्वक रातभरी निदाउन सक्दैनन् ।

नेकपा माओवादीका नेता रामचन्द्र सिंह भन्छन् ,–“गोलबजारमा शान्ति सुरक्षाको अवस्था कमजोर भएको छ । अपराध बढ्दै छ । लागू पदार्थको व्यापार र सेवनमा पनि नियन्त्रण भएको छैन । समाजमा त्रास फैलिएको छ । यसतर्फ स्थानीय प्रहरी र प्रशासनको ध्यान आकृष्ट हुन आवश्यक छ ।”

यस सम्बन्धमा इलाका प्रहरी कार्यालय गोलबजारका प्रहरी निरीक्षक गोविन्द साहसँग प्रतिक्रिया माग्दा उनले भने हत्या आफ्नो एरियामा नभएको प्रतिक्रिया दिए ।

उनले भने, “सुखीपुरको एरिया पर्छ । जहाँसम्म चोरी डकैतिको कुरा छ मैले पेट्रोलिङ्ग खटाएकै छु । प्रहरी घुमिरहेकै छ । अपराध नियन्त्रण गर्ने प्रयास गरिरहेकै छु ।”