पक्राउ गरिएका युवाहरुको रिहाईको माग गर्दै जिप्रका अगाडी तरुण दल र नेविसँघको धर्ना

न्यूज ब्यूरो |
जनकपुरधाम, ३१ जेठ । जिल्ला प्रहरी कार्यालय धनुषाले पक्राउ गरेको ५ जना युवाहरुको रिहाईको माग गर्दै जिल्ला प्रशासन कार्यालय धनुषा अगाडी धर्ना बसिएको छ ।

तरुण दल धनुषाका उपाध्यक्ष राकेश विक्रम साह सहित अमित पाठक, विजय मेहता, रमेश यादव र अखिल मणिक सहितका ५ जनालाई पक्राउ गरेको हो ।

उनीहरुलाई विना शर्त रिहाईको माग गर्दै नेपाली काँग्रेसका विद्यार्थी भातृ सँगठन नेपाल विद्यार्थी सँघ र तरुण दल धनुषाले जिप्रका धनुषा अगाडी विरोध जनाउँदै धर्नामा बसेका हुन् ।

धर्ना उनीहरुले दिउँसो १ बजेदेखि २ बजेसम्म धर्ना बस्ने नेविसँघ धनुषाका उपसभापति रवि शर्माले जनाए ।

नेविसँघ धनुषाका अध्यक्ष सुजित कुमार मिश्रको नेतृत्वमा दुई दर्जन बढी युवाहरुले धर्नामा बसेका हुन् ।

जनकपुर अञ्चल अस्पतालका मेसु डा. राम परीक्षण यादव उपर उनीहरुले कालोमोसो दलेको भन्दै प्रहरीले पक्राउ गरेका हुन् ।

उनीहरुलाई पक्राउ गरे लगत्तै जनकपुरका युवाहरु आन्दोलित भएका छन् भने चिकित्सकको लापरवाहीले सुत्केररिको ज्यान गएपछि अस्पतालको प्रणाली सुधार नगरेसम्म आन्दोलन जारी राख्ने बताएका हुन् ।