जनकनन्दिनी गाउँपालिकामा कृषि विद्युतिकरणको लागि सम्झौता, किसानको लागि कोसेढुुँगा

न्यूज ब्यूरो, जनकपुरधाम । पूर्वी धनुषाको जनकनन्दिनी गाउँपालिकाले स्थानीय किसानहरुको सिँचाईको लागि नेपाल विद्युत प्राधिकरणसँग सम्झौता गरेको छ ।

जनकनन्दिनी गाउँपालिकाभित्र रहेका किसानहरुको खेत खेतमा सिँचाई पुरयाउनको लागि नेपाल विद्युत प्राधिकरणसँग कृषि विद्युतिकरणको लागि सम्झौता भएको हो ।

जनकन्दिनी गाउँपालिका र नेपाल विद्युत प्राधिकरणको लागत साँझेदारीमा गाउँपालिकाभरि विद्युतिकरणको सम्झौता भएको हो । जसको लागि गाउँपालिकाले ९९ लाख रुपैयाँ र विद्युत प्राधिकरणले २४ लाख ७५ हजार रुपैयाँ गरी कुल १ करोड २३ लाख ७५ हजार रुपैयाँको विद्युतिकरणको सम्झौता भएको हो ।

विद्युतीकरणको लागि यसअघि कोटेशन, बीड मार्फत गरिदै आएकोमा अनियमितताको गन्ध आउने गरेको भन्दै गाउँपालिका अध्यक्ष दिपिनदेव यादवले सीधा विद्युत प्राधिकरणसँगै सम्झौता गरेका हुन् ।

प्राधिकरणसँग एक बर्षको लागि सम्झौता भएपनि आउँदो ६ महिनाभित्र सो रकमले पुग हुने गरी तार, पोल र ट्रासन्फर जडान गरिने भएको छ । यसको लागि कामदार, कर्मचारी समेत विद्युत प्राधिकरणले नै परिचालन गर्ने भएको छ ।

किसानहरुको खेत खेतमा सिँचाईको लागि यो सम्झौता जनकनन्दिनी गाउँपालिकावसाी, किसान, कृषकहरुको लागि कोसेढुँगा साबित हुने गाउँपालिकाका प्रमुख प्रशासकीय अधिकृत शैलेश यादवले बताए । यादवका अनुसार, सीधा प्राधिकरणसँग सम्झौता हुँदा काम समेत गुणस्तरीय हुनेमा विश्वास व्यक्त गरे ।

सम्झौताको लागि नेपाल विद्युत प्राधिकरण यदुकूहा वितरण केन्द्रका प्रमुख गोपाल ठाकुरसँग जनकनन्दिनी गाउँपालिकाको तर्फबाट गाउँपालिका अध्यक्ष दिपिनदेव यादव, गाउँपालिका उपाध्यक्ष कमला सहगल र योजना शाखा प्रमुख ई. मुकेश मण्डलको रोहबरमा गाउँपालिकाका प्रमुख प्रशासकीय अधिकृत शैलेश यादवले सम्झौता पत्रमा हस्ताक्षर गरेको हो ।