ठेकेदारले काम सुरु नगरेको भन्दै पकरियामा चक्काजाम

कुलदीप दास |
जनकपुरधाम, २३ जेठ । धनुषाको क्षिरेश्वरनाथ नगरपालिका वडा नम्बर ३ पकरियाका स्थानीयहरुले बुधबार चक्का जाम गरेका छन ।

क्षिरेश्वरनाथ नगरपालिका वडा नम्बर ३ पकरियामा सडक निर्माणको ठेक्का लागिसकेपनि निर्माण कार्य सुरु नगरिएको भन्दै स्थानियहरु बिहान ८ बजेदेखि ९ बजेसम्म चक्काजाम गरि आन्दोलनमा उत्रेका थिए ।

चारैतिर सडक निर्माण भईसकेपनि पकरियामा मात्रै सडकको केहि भाग निर्माण नभएकोले आफुहरु बिभिन्न समस्या भोग्न बाध्य रहेको उनीहरुले बताए ।

चैत बैशाख महिनामा धुलोले गर्दा आफुहरुको स्वास्थ्यमा असर परिरहेको र बर्षात मौसममा हिलो भएपछि आबत जाबतमा समेत कठिनाई भईरहेको स्थानीयको गुनासो छ ।

यता वडा नम्बर ३ का वडा अध्यक्ष जयकिशोर सिंहले केहि प्राविधिक कठिनाईका कारण सडक निर्माणमा ढिलाई भईरहेको बताए ।

उनले सडकमा रहेका पोलहरु चाँडै हटाएर निर्माण कार्यमा तिव्रता दिईने प्रतिबद्धता समेत जनाएका छन ।

सडक निर्माणमा तिव्रता दिन सम्बन्धित निकायको ध्यानाकर्षण गराउने उद्देश्यले सडक अबरुद्ध गरिएको बताईएको छ ।