मिर्चैयाः हेडमास्टर र लेखापाललाई विद्यार्थीले कार्यालयमै थुने

बिनय यादव/न्यूज ब्यूरो, सिरहा, १७ जेठ । सिरहाको मिर्चैया ५ मा रहेको श्री मोहन आवासीय प्राबिधिक माविका प्रधानाध्यापक र लेखापाललाई विद्यार्थीहरुले बिहीवार कार्यालयमै थुनेका छन् ।

विद्यालयमा प्राबिधिक तर्फ (भेटेनरी) अध्यनरत विद्यार्थीहरुले जिल्ला शिक्षा कार्यालयबाट दिइने रकम उपलब्ध गराउन आवाज उठाउँदा प्रअ अशोक यादव र लेखापाल विद्या सागर साहले गाली गरेपछि विद्यार्थीहरुले कार्यालयको ढोकामा तालाबन्दी गरेर थुनेका हुन् ।

प्रधानाध्यापक यादवलाई पटकपटक सो रकम उपलब्ध गराउन आग्रह गरेपनि झुठो आश्वासन दिदै आएको र वास्ता नगरेको विद्यार्थीहरुको आरोप छ ।

आज पुनः आग्रह गर्दा प्रअ र लेखापालले गालीगलौज गरेपछि बाध्य भएर कार्यालयमा थुनेको अगुवा विद्यार्थी जगदिश साहले जानकारी दिए ।

यता, विद्यालय व्यवस्थापन समितिका अध्यक्ष तथा नगरप्रमुख श्रवण कुमार यादवको उपस्थितिमा विद्यार्थीहरुलाई वार्ताको लागि आग्रह गरेपछि लगाइएको ताला खोलेर प्रअ, लेखापाल, विद्यार्थी र मेयर यादवबीच भएको बार्तामा चाँडै रकम उपलब्ध गराउने र अबदेखि यस्ता कुनै कार्य नहुने सहमति भएको ईप्रका मिर्चैयाका डिएसपी दिपक कुमार खड्काले बताउनुभयो ।