धनुषाधाम ५ का वडाध्यक्ष महतोले गरे कृषि बिल फ्री, किसानहरु हर्षित

न्यूज ब्यूरो, जनकपुरधाम । धनुषाको धनुषाधाम नगरपालिका वडा नं ५ का वडा अध्यक्ष इन्द्र कुमार महतोले किसानको बिजुली बिल वडा स्तरीय योजनाबाट तिरिदिने बताएका छन ।

कृषि प्रधान देश भनिएपछि कृषक, किसानहरुको लागि सरकारले खासै चासो नदेखाएको अवस्थामा स्थानीय सरकारको हैसियतले वडाध्यक्ष महतोले कृषिको बिजुली बिल निःशुल्क गरिदिएको हो ।

दोस्रो पटक निर्वाचित भएका वडाध्यक्ष महतोले किसानहरुसँग गरेको वाचा अनुसार यसपालीदेखि कृषिको बिजुली बिल निःशूल्क गरेको हो । वडाभरिका किसानले बिजुलीबाट गर्ने सिँचाईमा पूर्णतः बिल छुटको व्यवस्था वडाबाट गरिदिएका हुन् ।

“नेपाल कृषि प्रधान देशहो हाम्रो विकास भनेको सब भन्दा पहिला कृषि क्षेत्रमा विकास गर्नु आवश्यक देखिन्छ । मेरो दोस्रो कार्यकाल छ, मैले पहिलो कार्यकाल देखि कृषिमा जोड दिदै आएको छु । बिधुतिकरण,कृषि सडकहरुको काम गरि यसपाली किसानको सहुलियत स्वरुप वडाभरीका किसान कृषि मिटर बाट खपत भएको बिजुली बिल वडास्तरीय योजनाबाट दिने भनेर घोषणा बमोजिम वाचा निभाएको छु ।”– उनले भने ।

अहिले सम्मको बक्यौता बिजुली बिल किसानलाई तिर्नुपर्ने बताउँदै उनले कार्तिक महिनादेखि आउने बिजुली बिल नगरपालिकाबाट तिर्ने जानकारी गराएको छ ।

वडा भरिका किसानहरु कृषिमा अधारित छ । कृषि मिटर र बिजुली बिल समेत तिरदिने भए पछि वडाअध्यक्ष महतोको स्थानीय किसानहरुले प्रसँशा गरे ।