ज्याम्बोरीमा जनकपुरबाट मोनाष्टिक  पनि सहभागी

दीपक कर्ण |
जनकपुरधाम, १५ जेठ । पाचँ बर्षपछि नुवाकोटको ककनीस्थीत नेपाल स्काउट अन्तर्राष्ट्रिय तालिम केन्द्रमा आयोजना हुन लागेको नेपाल स्काउटको ज्याम्बोरीमा सहभागीता जनाउन जनकपुरस्थित मोनाष्टिक उच्च मा।वि।का विद्यार्थी र शिक्षकहरु त्यसतर्फ प्रस्थान गरेका छन ।

मंगलबार विद्यालय परिषरबाट विद्यालयका ३ जना शिक्षक र १७ जना विद्यार्थीको टोली त्यसततर्फ प्रस्थान गरेका हुन ।

विद्यालयका शिक्षक बिरेन्द्र कर्णको नेतृत्वमा उनीहरु ज्याम्बोरीमा सहभागिता जनाउन गएका हुन ।

बुधबारदेखि जेठ २१ गतेसम्म स्काउट बृहत् भेला ‘तेस्रो नेपाल स्काउट ज्याम्बोरी’ नुवाकोटको ककनीस्थित अन्तर्राष्ट्रिय ज्याम्बोरी स्थलमा आयोजना गरिएको हो ।

७ प्रदेशका ७० भन्दा बढी जिल्लाका करिब ५ हजार स्काउट सहभागी हुने ज्याम्बोरीमा विभिन्न क्रियाकलाप समावेश गरिएको छ ।

यसअघि २०७० वैशाखमा चितवनको टिकौलीमा भएको दोस्रो ‘नेपाल स्काउट ज्याम्बोरी’मा समेत मोनाष्टिकले सहभागिता जनाईसकेको विद्यालयका निर्देशक सोनु कुमार साहले बताए ।

ज्याम्वोरीको उद्घाटन भने जेठ १७ गते प्रधानमन्त्री केपी शर्मा ओलीले गर्ने कार्यक्रम रहेको नेपाल स्काउटले जनाएको छ । तेस्रो ज्याम्बोरीमा नेपालका स्काउटका अतिरिक्त भारत,बंगलादेश,पाकिस्तान,माल्दिभ्स,श्रीलंका,एसिया प्रशान्त क्षेत्र सदस्य मुलुकका स्काउट,संगठन पदाधिकारी,विश्व स्काउट संगठन केन्द्रीय कोषाध्यक्षसहित अमेरिकासमेतका स्काउट सहभागी रहने छन ।

यसअघि नेपालमा २०४३ साल १६ देखि २२ चैतसम्म कीर्तिपुरमा पहिलो र २०६९ साल २७ चैतदेखि २०७० साल २ वैशाखसम्म चितवन टिकौलीमा दोस्रो ‘नेपाल स्काउट ज्याम्बोरी’ सञ्चालन भएको थियो ।