बलवा पडौलका वडाध्यक्ष यादवले साना किसान सहकारीमा तोडफोड र लुटपाट गराएको आरोप

न्यूज ब्यूरो, जनकपुरधाम । महोत्तरीको बलबा नगरपालिकाका एक वडाध्यक्षले सहकारी सँस्थामा तोडफोड गराएको आरोप लगाईएको छ ।

बलवा नगरपालिका वडा नं.४ का वडाध्यक्ष प्रमोद कुमार यादवले सोही वडामा स्थापित साना किसान कृषि सँस्था बलवा पडौलमा तोडफोड गराएको आरोप सँचालकहरुले लगाएका छन् ।

साना किसान सहकारी सँस्थाबाट विभिन्न समयमा विभिन्न सर्वसाधारणहरुले ऋण लिएकोमा तागेदा गर्दा वडाध्यक्ष व्यक्तिगत लिएर मुद्दा बनाउँदै सहकारी तोडफोड गराएको आरोप लगाउँदै कारवाहीसहित क्षतिपूर्तिको माग गरिएको हो ।

साना किसान सहकारी सँस्था बलबाकी अध्यक्ष रिना देवी मण्डलले एक विज्ञप्ति जारी गर्दै वडाध्यक्ष यादवले विभिन्न मानिसहरुलाई कार्यालयमा ल्याई तोडफोडको साथै नगद र जिन्सी समान समेत लुटेर लगेको भन्दै क्षतिपूर्ति वडाध्यक्षबाट दिलाउन प्रशासनसँग माग गरिएको हो ।

ऋणीहरुसँग ऋण चुक्ताको लागि मौखिक तागेदा गर्दा स्थानीय प्रतिनीधिको हैसियतले राजनीतिक रिसबीले गर्दा वडाध्यक्षले तोडफोड गराएको आरोप छ । ऋणीसँग ऋण चुक्ता गर्न पहलकदमी गर्न र जानकारी गराउन सँस्थाको नियम भएपनि वडाध्यक्ष यादवले आफ्नो मान्छेलाई तागेदा गरेको भन्दै तोडफोड गर्न लगाएको आरोप छ ।

वडाध्यक्ष यादवले गत साउन ११ गते दिउँसो १२ः३० बजेको समयमा मानिसहरुको जमात ल्याएर तोडफोड गर्नुको साथै सँचालक समितिको सदस्यहरुमाथि हातपात समेत गराएको आरोप लगाउँदै शान्ती सुरक्षा र जीउधनको सुरक्षाको माग समेत गरिएको छ ।

एक अडियो कल रेडर्कमा वडाध्यक्ष प्रमोद कुमार यादवले सँचालक समितिका एक सदस्यलाई गालीगलौज र धाकधम्की दिएको प्रष्ट सुनिएको छ । (अडियो प्रमाण छ)