नरहा गाउँपालिकाका अध्यक्ष नै गराउँछन अवैद्य उत्खनन, फ्री को ग्राभेलले करोडौँको रकम हुन्छ निकासा

सबिन यादव, सिरहा । सिरहाका नरहा गाउँपालिकाका अध्यक्षको प्रत्यक्ष सँलग्नतामा अवैद्यानिक ग्राभेल उत्खनन भईरहेको पाईएको छ ।

सिरहाको नरहा गाउँपालिका वडा नं. ३ नयाँ चोहर्बास्थित भईरहेको अवैद्य र गैरकानुनी उत्खननको लागि गाउँपालिका अध्यक्ष रामप्रमोद यादव (डमर) को प्रत्यक्ष रोहबरमा उत्खनन भईरहेको पाईएको छ ।

स्थानीय सरकार गठन भएपछि स्थानीय सरकारकै मातहतमा भूमि परेपछि सो गाउँपालिकाभित्र हुने उत्खननको अनुमति समेत स्थानीय सरकारले नै दिनुपर्ने नियम रहेको छ । सोही नियमको फाईदा उठाउँदै गाउँपालिका अध्यक्षले ग्राभेल माफिया दिपेन्द्र यादव र रामबाबु यादवसँग ग्राभेल उत्खनन गराउँदै आएका छन् ।

जिल्ला समन्वय समितिको कार्य क्षेत्रमा अनुगमन मात्र परेको नियमलाई लाभ उठाउँदै नरहा गाउँपालिकाका अध्यक्ष डमर यादवले ग्राभेल माफीया यादवद्धयबाट उत्खनन गराउँदै आएका छन् । जिल्ला समन्वय समितिमाथि दोष थुपार्दै आएका गाउँपालिका अध्यक्ष यादवको प्रत्यक्ष निर्देशन र मिलोमत्तोमै ग्राभेल उत्खनन भईरहेको छ ।

जिल्ला समन्वय समितिका अधिकारी द्रोपति यादवका अनुसार, नरहा गाउँपालिका वडा नं. ३ मा विभिन्न ठाउँमा भएको उत्खनन सबै गैरकानुनी रहेको पुष्टि गरेकी छन् । उनले स्थानीय तहको अनुमति बिना उत्खनन गर्न नपाउने भएपनि उत्खनन गर्नु स्थानीय तहको प्रत्यक्ष मिलोमतो हुन सक्ने बताइन् ।

उनले भनिन्, “मैले विभिन्न समयमा अनुगमन पनि गरेको छु, त्यहाँ गएर आफैँ हेरेको छु, अवस्था दयनीय छ । सबै गैरकानुनी उत्खनन छ । र यसमा जिल्ला समन्वय समितिको केही लगाव छैन, गाउँपालिकाको मातहतमा पर्ने भएकोले हामी पनि बाध्य छौँ । यसको जिम्मेवारी गाउँपालिकाकै हुनुपर्छ ।”

गाउँपालिका अध्यक्ष यादवले उत्खनन गर्न दिए वापत हजारौँ ट्रिपर ग्राभेल मुफ्तमा दिनुपर्ने सम्झौता गरेको स्रोत बताउँछन् । गाउँपालिकाले राख्ने माटो ग्राभेलको योजनामा आफ्नै खानी खनेर फ्री को ग्राभेल हाल्दै सरकारी बजेट निकासा गरी झवाम्म पार्ने गरेको छ ।

ग्राभेल खन्दा सरकारलाई बुझाउनुपर्ने राजस्व समेत उत्खनन माफिया यादवद्धयले दिदैनन् । नरहा गाउँपालिकाको रेकर्डमा समेत ग्राभेल बेचे वापतको आन्तरिक राजश्वको कुनै अतोपत्तो छैनन् ।

यता, गाउँपालिका अध्यक्ष यादवले भने आरोप अस्विकार गरे । उनले आरोपलाई खण्डन गर्दै आफू पनि विभिन्न समयमा ग्राभेल उत्खनन गर्नेलाई समात्नको लागि निस्केपनि कहि कतै उत्खनन गरेको नदेखेको प्रतिक्रिया दिए । उनले आफू निगरानीमा राखेको बताउँदै कसैले देखेमा जानकारी गराउन पनि बहाना बनाए ।