सिरहामा उत्खनन माफिया यादवको आतंक, वन खनेर वन विनाश, प्रहरी उठाउँछन महिनवारी

न्यूज ब्यूरो, सिरहा । सिरहा जिल्लाभरिमा उत्खनन माफियाको आतंकले सिरहावासी आतंकित छ । सिरहाको नरहा गाउँपालिका वडा नं. ३ स्थित करोडौँको ग्राभेल खनेर वन नास गरेका ग्राभेल माफिया रामबाबु यादवलाई सिरहा प्रहरीले संरक्षण दिएका छन् ।

जिल्ला समन्वय समिति सिरहा र सिरहा प्रहरीको प्रत्यक्ष संलग्नतामा करोडौँको अवैद्य उत्खनन गरेका उत्खनन माफिया रामबाबु यादवलाई प्रहरीले अझै संरक्षण दिरहेको पाईएको छ ।

जिल्ला समन्वय समिति सिरहाले समय समयमा १५ देखि २० हजारसम्मको जरिवाना देखाएर करोडौको ग्राभेल मिलोमत्तोमा बेच्ने गरेको छ । वन नास गरी वनबाटै २० फिटभन्दा तलसम्म ग्राभेल उत्खनन गरेको छ । नरहा गाउँपालिका वडा नं. ३ स्थित वनमा बर्षौदेखि प्रहरीकै नाकमुनीबाट ग्राभेल ओसार पोसार समेत गर्ने गरेको छ ।

सिरहाको गोलबजार नगरपालिका वडा नं. ९ स्थितबाट समेत उत्खनन माफिया रामबाबु यादवले दर्जनौ ट्रिपर लगाएर करोडौँको ग्राभेल उत्खनन गरिरहेका छन् । ईलाका प्रहरी कार्यालय मिर्चैयाको प्रत्यक्ष संलग्नतामा करोडौँको ग्राभेल उत्खनन गरी बेच्दा प्रहरीले चुईक्क नबोलेको स्थानीयहरुले आरोप लगाएका छन् ।

राती १० बजेपछि रातभरि नै दर्जनौ ट्रिपरमा लाखौँको ग्राभेल ढुवानी गर्ने गरेको छ । वनमा अवैद्य उत्खनन जारी रहँदा डयुटीमा रहेका प्रहरीले नै ट्रिपर पार गराउने गरेको छ । नरहा ३ चोहर्बाचोक लगत्तै यतिको दिनदेखि उत्खनन भईरहँदा समेत सोही ठाउँमा डयुटीमा रहेका प्रहरीले नै हरिझण्डी दिने गरेको छ ।

भू–माफियाको नामले समेत चिनिने रामबाबुले प्रहरीलाई पोकेटमा राख्ने गरेको तर्क दिरहेका छन् । उनले सिरहका पत्रकारहरुलाई समेत गोजीमा लिएर हिँडेको प्रतिक्रिया दिएका छन् । जानकारी अनुसार, यादवबाट सिरहाका पत्रकारहरुले समेत मासिक बुझने गरेका छन् ।

जिल्ला समन्वय समिति सिरहाका अध्यक्ष दिनेश महतोको प्रत्यक्ष ईसारा र मिलोमत्तोमा अवैद्य उत्खनन जारी रहेको छ । विभिन्न समयमा माफियाद्धयको बारेमा समाचार आएपनि समन्वय समितिले मिडियावाजीको लागि १५ हजारको जरिवाना काटेर लाखौँको ग्राभेल बेच्ने गरेको आरोप छ ।

पत्रकार पुग्दा मिर्चैया प्रहरीले नै उत्खननकर्ता चालकहरुको ट्रिपर भगाउने गरेका छन् । माफियासँगको प्रत्यक्ष सम्पर्कमा रहेका मिर्चैया प्रहरीले उनीहरुबाट मासिक बुझेर लाईन दिएको छ ।