सिरहामा धारिलो हतियार प्रयोग गरी एक युवकको हत्या

न्यूज ब्यूरो, सिरहा, ३ जेष्ठ । सिरहाको कल्याणपुर नगरपालिकामा एक युवकको हत्या भएको छ ।

कल्याणपुर नगरपालिका १ अर्नामा बनिनियाँमा धारिलो हतियार प्रहारबाट गोपी सदाका २२ वर्षीय छोरा उमेश सदाको मृत्यु भएको प्रहरीले जनाएको छ ।

सदाको घाँटीमा धारिलो हतियार प्रहार गरिएको छ । मृतक सदाको शव अर्नमा बनिनियाँको लोहजारा नदिमा भेटिएको छ ।

सदा वैदेशिक रोजगारीवाट १ वर्ष पहिले फर्किएका थिए । एउटा मात्रै छोरा रहेको गोपी काठमाडौको एक ईटाभट्ठामा काम गरिरहेको छ । बुधवार साँझदेखी वेपता भएको सदाको शव आज (बिहिवार) दिउँसो ४ बजे स्थानीयले देखेपछि प्रहरीलाई खबर गरेको थियो ।

प्रहरीले शव पोस्टमार्टमको लागि जिल्ला अस्पताल सिरहा ल्याउने तयारी गरेको छ । घटना सम्बन्धमा अनुसन्धान सुरु गरिएको प्रहरी प्रवक्ता राजन भेटवालेले बताए ।