मधेश प्रदेशको ८ वटै जिल्लामा भेट एम्बुलेन्स र घुम्ती माटो परीक्षण ल्याब सँचालन हुने

न्यूज ब्यूरो, जनकपुरधाम । मधेश प्रदेशका भूमि ब्यवस्था, कृषि तथा सहकारी मन्त्री ई. बसन्त कुशवाहाको विशेष पहलमा प्रदेशको ८ वटै जिल्लामा भेट एम्बुलेन्स र घुम्ती माटो परीक्षण ल्याब सँचालन हुने भएको छ ।

आर्थिक बर्ष २०८०/०८१ मा मधेश प्रदेशका लागी कृषिमा आवश्यक ठुला परियोजना तथा कार्यक्रमका लागी संघीय मन्त्रालय मार्फ़त बजेट विनियोजनका लागी सरोकारवाला छलफलमा सबै जिल्लामा सो एम्बुलेन्स र परीक्षण ल्याब सँचालन गर्ने योजना ल्याएको हो ।

राष्ट्रिय योजना आयोगका सदस्य डॉ. जयकान्त राउत, कृषि तथा अर्थ मन्त्रालयका सम्बन्धित प्रमुख पदाधिकारीहरुको वृहत बैठकले मधेश प्रदेशको सबै जिल्लामा भेट एम्बुलेन्स र माटो परीक्षणको लागि घुम्ती शिविर सँचालन गरिने भएको छ । यसले किसानको खेतको बाटो परीक्षण गरी उर्बराशक्ति बढाउने प्रयास गरिने जनाइएको छ ।

यस्तै, मधेश प्रदेशको हरेक वडामा थप जैविक मलखाद उद्योग स्थापना, हरेक पालिका (१३६) मा साना कृषि बजार ब्यवस्थापन, हरेक निर्वाचन क्षेत्र (३२) मा ठुला कृषि बजार ब्यवस्थापन, हरेक निर्वाचन क्षेत्रमा ५०० टन माथीको कोल्ड स्टोर स्थापना, हरेक निर्वाचन क्षेत्र मा कृषि औजार कस्टम हायरिंग सेण्टर, हरेक जिल्लामा कृषि पर्यटनका लागी पूर्वधार बिकास, हरेक जिल्लामा घुम्ती माटो परीक्षण ल्याब, हरेक जिल्ला मा घुम्ती भेट एम्बुलेन्स, किसान कार्ड तथा किसान पेन्शनको ब्यवस्थापन, सुलभ तथा सहुलियत ऋणको ब्यवस्थापन, वालीनाली तथा पशु पंछीको बीमा, कृषि बिधुतीकरण, सिचाई तथा निःशुल्क कृषि मीटर खेती प्रणालीलाई सेटेलाईट, डिजिटल ईमिजिनेशन प्रणालीसँग जोडने, मधेश प्रदेशका कृषि उत्पादनका लागी काठमाण्डौ उपत्यकाभित्र बजार क्षेत्र निर्माण गरिने योजना बनाएको छ ।

सो बैठकमा आगामी आर्थिक बर्षमा मधेश प्रदेशका लागी निम्न योजना तथा कार्यक्रमहरु समावेश गर्ने छलफल भएको कृषिमन्त्री कुशवााले जानकारी दिए ।