सिरहाः हावाहुरीले एकको मृत्यु, तीन घाइते, करोडौंको क्षति (फोटो फिचर)

न्यूज ब्यूरो ||
सिरहा, २६ बैशाख । बुधबार विहान आएको हावाहुरीले सिरहामा एक जनाको मृत्यु भएको छ । गाईगोठ नजिकै टायरगाढामा सुतिरहेका मिर्चैया नगरपालिका १० पिप्राका ७५ वर्षिय सगुनी महतोको किचिएर मृत्यु भएको हो ।

गाईगोठका छाना र टाटीले किचिएर महतोको मृत्यु भएको जिल्ला प्रहरी कार्यालय सिरहाले जनाएको छ । यस्तै, गोलबजार नगरपालिकामा घरमा सुतिरहेका श्रीमान श्रीमती पर्खाल भत्किएर घाईते भएका छन् । गोलबजार नगरपालिका ४ का २३ वर्षीय रामजिवन ठाकुर र उनको श्रीमती २० वर्षिया अंजली ठाकुर घाईते भएको प्रहरीले जनाएको छ । दुवैको टाउको फुटेको र स्थानीय स्वास्थ्य संस्थामा उपचार भइरहेको जनाइएको छ ।

यस्तै, सुखिपुर नगरपालिकामा पनि एक जना घाईते भएको छ । सप्तरी रुपनगर नगरपालिका घर भएका निर्माण क्षेत्रमा काम गर्ने मिस्त्री श्रीप्रसाद सरदार घाईते भएको प्रहरीले जनाएको छ । पिलरले किचिएर सरदार घाईते भएको छ ।

यता, हावाहुरी र वर्षाले जिल्लामा करोडौंको क्षति भएको छ । ठाउँठाउँमा बिद्युतका पोलहरु खसेपछी सिरहा, कर्जन्हा, कल्याणपुर, मिर्चैया, सुखिपुर, गोलबजार नगरपालिका, बिष्णुपुर, नरहा, अर्नामा, औरही, बरियारपट्टि लगायतका गाउँपालिकामा बिद्युत ठप्प छन् ।

हावाहुरीले विद्यालय भवन, प्रहरी चौकी, आपको रुखमा ठूलो क्षति गरेको छ । लटरम्म फलेको आँप सवै सखाप भएको कृषकहरूको भनाई छ । यता, सयौं घरका छाना, टाटी हावाहुरीले उडाएर क्षति गरेको छ ।