धनुषामा एक युवकलाई ज्यानै मार्ने प्रयास (प्रेम प्रसँग)

न्यूज ब्यूरो ||
जनकपुरधाम, २१ बैशाख । धनुषामा एक युवकलाई ज्यान मार्ने प्रयास गरिएको छ ।

धनुषाको शहिदनगर नगरपालिका वडा नं. २ चोराकयलपुर मतौना बस्ने महेन्द्र प्रसाद यादवको छोरा २६ बर्षिय विपिन कुमार यादवलाई गएराती ज्यान मार्ने प्रयास गरिएको छ ।

यादवलाई चोराकयलपुर मतौनामै निर्घात कुटपिट गर्दै बाँया खुट्टा भाँचेका छन् भने नाकमा समेत गम्भिर चोट लागेको छ ।

स्थानीय एक युवतिसँग प्रेम सम्बन्धमा रहदै आएका विपिनले ती युवति भेटन जाँदा गएराती युवति पक्षले ज्यानै मार्ने प्रयास गरिएको प्रहरीले प्राथमिक अनुसन्धानलाई उदृत गर्दै न्यूज ब्यूरोलाई जनाए ।

केही वर्षदेखि वैदेशिक रोजगारीमा रहेका विपिनलाई गाउँकै एक युवतिसँग प्रेम सम्बन्ध भएको तथा वैदेशिक रोजगारीबाट आएपछि ती युवतीलाई जबरदस्ती सिन्दुर हालेको भन्दै आक्रोसित युवती पक्षले विपिनलाई कारवाहीको लागि प्रहरी गुहारिएको थियो ।

ईलाका प्रहरी कार्यालय यदुकुहाले विपिनलाई उजुरीको आधारमा पक्राउ गरि सार्वजनिक मुद्दा चलाएको थियो ।

करिब एक महिनादेखि प्रहरी हिरासतमै रहेका विपिन विहिबार (हिजो) मात्र रिहा भएका थिए ।

रिहा भएलगत्तै अबेर राती युवतिको घर पुगेका विपिनलाई युवती पक्षले साँघातिक आक्रमण गर्दै ज्यानै मार्ने प्रयास गरिएको ईलाका प्रहरी कार्यालय यदुकूहाका ईन्चार्ज पवन झाले बताए ।

चोराकयलपुर मतौनाबाट कुटपिट गर्दै धनुषाको बेमरखीमा लगेर फालिदिएको अवस्थामा प्रहरीको गस्ती टोलीले विपिनलाई उद्धार गरेको थियो ।

त्यहाँ स्थित राप्रावि बेमरखी खालको बरण्डामा फालिएको अवस्थामा प्रहरीले उद्धार गर्दै एम्बुलेन्स मार्फत जनकपुर अञ्चल अस्पताल पठाइएको जनाइएको छ ।

विपिनको अहिले जनकपुर अञ्चल अस्पतालमा उपचार भईरहेको छ भने उनको अवस्था अति गम्भिर रहेको छ ।

विपिनको बयानको आधारमा कुटपिटमा सँलग्न भएको आरोपमा स्थानीय ३० बर्षिय रामकृष्ण यादवलाई प्रहरीले पक्राउ गरेको छ ।

पक्राउ परेका यादव युवतीको काका रहेको प्रहरीले जनाएको छ भने अन्य फरार रहेको छ ।