सिरहामा श्रीमानको कुटाईबाट गर्भवती श्रीमतीको ज्यान गयो

न्यूज ब्यूरो ||

सिरहा, १९ वैशाख । सिरहाको गोलबजार नगरपालिका वडा नं. ७ चोहर्वामा आफ्नै श्रीमानको कुटाईबाट श्रीमतिको ज्यान गाएको छ । गोलबजार नगरपालिका वडा नं. ७ चोहर्वाका ३५ वर्षीय कृष्ण शर्माको कुटाईबाट उनकी २३ वर्षीया श्रीमती प्रभादेवी शर्माको ज्यान गएको माइती पक्षले आरोप लगाएका छन् ।

मंगलबार बेलुका मरणासन्न हुनेगरी कुटपीट गरी बहोस भएकी प्रभालाई उपचारको लागि कर्जन्हा स्थित फूलकुमारी मेमोरीयल अस्पताल लैजाँदै गर्दा बाटोमै मृत्यु भएको इलाका प्रहरी कार्यालय गोलबजारले जनाएको छ ।

मृतकको नाकबाट हल्का रगत आएकोले कुटपिटको आशंका गरिए पनि पोष्टमार्टम पछि मात्र केही भन्न सकिने प्रहरीले जनाएको छ । प्रहरीले मृतकका पति कृष्णलाई अनुसन्धानको लागि नियन्त्रणमा लिएको छ ।

सोधपुक्षको क्रममा मृतकका पति कृष्णले मंगलबार आफुहरुबिच बिवाद भएको र विवाद हुदा आफुले ३/४ झापड हिर्काएको भनी प्रहरी समक्ष बताएको प्रहरीले जनाएको छ । उनीहरुको एक १६ महिनाकी छोरी रहेको र प्रभाको पेटमा ३ महिनाको गर्भसमेत रहेको परिवारजनले जनाएको छ ।