हेलिकप्टर चार्टर गरी मोदी भारतबाट सिधै माता जानकीको शरणमा

न्यूज ब्यूरो ||
जनकपुरधाम, १८ बैशाख । आउँदो बैशाख २८ गते जनकपुर आउन लागेका भारतीय प्रधानमन्त्री नरेन्द्र मोदी भारतबाट तीन हेलिकप्टर चार्टर गरी सिधै जनकपुर आउने भएको छ ।

कुनैपनि देशका राष्ट्रप्रमुख वा प्रधानमन्त्री नेपालको औपचारिरक भ्रमणमा नेपाल आउदा काठमाडौं पहिला आउने चलनलाई पन्छाउँदै सिधै माता जानकीको शरणमा आउने भएको छ ।

मोदी भारतको विहारबाट तीन वटा हेलिकप्टर चार्टर गरेर बैशाख २८ गते जनकपुर आउन लागेको गृहमन्त्री रामबहादुर थापाले जानकारी दिएका छन् ।

मोदीको जनकपुर भ्रमण हुन लागेपछि सुरक्षा व्यवस्था मिलाउन मँगलबार जनकपुर आईपुगेका गृहमन्त्री थापाले मोदीलाई बाह्रविघा मैदानदेखि जानकी मन्दिरसम्म पाँच तहको सुरक्षा दिने जानकी दर्शन गराउने कार्यक्रम रहेको छ ।

सीधै जनकपुर आउन लागेका मोदीलाई त्यही दिन प्रधामन्त्री ओलीले अभिनन्दन गर्नेछ । भारतीय सेनाका तीनवटा हेलिकोप्टर र सुरक्षाकर्मीसहित नेपाल आउन लागेका मोदीले वैशाख २८ गते जनकपुरस्थित जानकी मन्दिरको दर्शन गर्ने कार्यक्रम प्रमुख भएपछि जानकी मन्दिरको सजावट र सफाई समेत तिव्र पारिएको छ ।

मोदीको भ्रमणको सुरक्षा अवस्थाबारे बुझ्न जनकपुरै रहेका गृहमन्त्री थापाले जिल्ला प्रहरी कार्यालय धनुषामा आयोजित पत्रकार सम्मेलनमा भारतीय प्रधानमन्त्री मोदीले भ्रमणका बेला जनकपुरधाममा पूजाआजा गर्ने र मुक्तिनाथ दर्शनका लागि मुस्ताङ जाने पनि जानकारी समेत दिए ।

मोदीको यो भ्रमण धार्मिक भ्रमण रहेको तथा यस अवधिमा कुनैपनि राजनीतिक सम्झौता नहुने स्पष्ट समेत पारे ।

मोदीको भ्रामणलाई लिएर सुरक्षा व्यवस्था चुस्त पारिएको छ । भारतीय प्रधानमन्त्री मोदीलाई बाह्रविगामा नागरिक अभिनन्दनको तयारी पनि भएको छ ।

गृहमन्त्री थापाले भारतीय प्रधानमन्त्री मोदीको सुरक्षाको जिम्मा राष्ट्रको हो भन्दै उच्च सुरक्षाको व्यवस्था गरिएको जानकारी दिए ।

भारतीय प्रधानमन्त्री मोदीको धार्मिक भ्रमणले दुई देशको धार्मिक र सांस्कृतिक सम्बन्ध सुदृढ हुने विश्वास गरिएको छ ।

कैयौँ पटक फेल भएको मोदीको यसपालीको जनकपुर भ्रमण पूर्णत पक्कापक्की भएको छ ।

विश्वप्रसिद्ध एवम् आस्थाको केन्द्र रहेको जनकपुरको जानकी मन्दिरमा दर्शन पूजा गर्न पहिलो पटक जनकपुर आउन लागेका हुन् ।