सिरहाको नरहा गाउँपालिकाको कृषि हाकिम यादवको भारी कालोबजारी, किसानको १०० बोरा बीउ व्यापारीलाई

न्यूज ब्यूरो, सिरहा । मधेश प्रदेशस्थित सिरहा जिल्लाको नरहा गाउँपालिकाको कृषि शाखामा व्यापक कालोबजारी देखिएको छ ।

किसानको लागि आएको १०० बोरा गहुँको बीउ व्यापारीलाई दिएको खुलासा भएको छ । गाउँपालिकाबाट सहुलियत मूल्यमा उपलब्ध हुने गहुँको बीउबिजन किसानलाई नदिई सीधा व्यापारीलाई बेचेको खुलासा भएको छ ।

नरहा गाउँपालिकाको नाममा दिएको १०० बोरा गहुँको बीउ स्थानीय एक व्यापारीलाई बेचेको खुलेको छ । नरहा गाउँपालिका वडा नम्बर ५ बलबा बस्ने स्थानीय व्यापारी अमिरी यादवमार्फत १०० बोरा गहुँको बीउ बेचेको खुलेको छ ।

व्यापारी अमिरी यादवले चर्को मूल्य लिएर स्थानीय किसानहरुलाई गहुँको बीउ बिजन उपलब्ध गराईरहेको जानकारीपछि स्टीँग अपरेशनमा गएको न्यूज ब्यूरोको टोलीले बिउबिजन कालोबजारीको पर्दाफास गरेको हो ।

कुनै फर्म, सहकारी वा दर्ता नै नभएको तथा पसल समेत नरहेको अमिरीले गाउँपालिकाको नाममा आएको १०० बोरा गहुँको बीउ सीधा आफ्नो घरमा थापेर बेच्न लागेको हो ।

न्यूज ब्यूरोको टोलीले ४० किलो गहुँबीउको ३००० रुपैयाँ लिएको भनेर बिल दिन भनेपछि उनले बिल दिएनन् । उनले आफू कतैबाट किनेर ल्याई बेचेको मात्र बताए । बिल मागेपछि उनको अनुहार रातोपहेलो भएको थियो ।

नरहा गाउँपालिकाका कृषि शाखा प्रमुख राम प्रकाश यादवले गाउँपालिकाको किसानको लागि सहुलियत दरमा वितरण गर्नुपर्ने गहुँको बीउ सीधा अमिरी यादवलाई बेचेर कालोबजारी गरेको हो ।

गाउँपालिकाका कृषि शाखा प्रमुख यादवले चुनाव अघिदेखि नै कुनै प्रकारको बीउ बिजन गाउँपालिकामा नआएको प्रतिक्रिया दिए । तर, लहानस्थित रहेको सरस्वति खाद्य बिज भण्डारबाट गाउँपालिकाको नाममा आएको १०० बोरा गहुँको पुष्टि गरेपछि ठुलो कालोबजारी भएको शंका लागेको थियो ।

चुनावअघि नै सो बिज भण्डारबाट गाउँपालिकाको नाममा ल्याएको १०० बोरा गहुँको बीउ स्थानीय किसानलाई नदिएर सीधा एक स्थानीय व्यापारीलाई चर्को मूल्य लिएर बेचेको पाईएको छ ।

किसानहरुले सहुलियत मूल्यमै पाउनुपर्ने गहुँको बीउ प्रतिकिलो ७५ रुपैयाँको दरले विक्री वितरण गर्न लागेको पाईएको छ । गाउँपालिकाको मातहतमा वितरण हुनुपर्ने गहुँको बीउ व्यापारी मार्फत विक्री वितरण गर्न लगाएका छन् नरहा गाउँपालिकाका कृषि अधिकृत रामप्रकाश यादव ।

यता, कृषि अधिकृत रामप्रकाश यादवले गाउँपालिकामा बीउ नै नआएको प्रतिक्रिया दिए भने लहानको बिज भण्डारले गाउँपालिकाको नाममा १०० बोरा गहुँको बीउ खरिद भएको प्रतिक्रिया दिएपछि बीचमा गहुँको ठुलो कालोबजारी भएको देखिएको छ ।