चन्द्रनगरका अध्यक्षले गरे विद्यालयमा छड्के जाचँ, अनुपस्थित कर्मचारीको हाजरीमा लगाए रातो कलम

न्यूज ब्यूरो, सर्लाही। सर्लाहीको चन्द्रनगर गाउँपालिकाको अध्यक्ष राजकुमार महतोले वडा नम्बर ५ मोहनपुर स्थित श्री अरनिको आधारभुत विद्यालयमा छड्के अनुगमन गरेको छ ।

विद्यालयका केही शिक्षक नियमित रुपमा अनुपस्थित हुने गरेको र विद्यालयमा कहिलेकाँही आउँदा अनुपस्थित भएका दिनका पनि हाजिरी गर्ने गरेको गुनासो सर्वसाधारण आएपछि आज अपरान्ह गाउँपालिका अध्यक्ष महतो आफै स्थलगत अनुगमन गरी कडा निर्णय गरेको हो ।

विद्यालयमा अनुपस्थित रहेर पनि हाजिरी गरेका, आज छडकेको दिन पनि अनुपस्थित रहेका शिक्षकको बारेमा विद्यालयको प्रधानाध्यापक, अन्य शिक्षकहरू तथा स्थानीय अगुवाहरू सित छलफल गरी र वहाँले पनि मौखिक रुपमा रुजु गरे पछि अध्यक्ष महतोले विद्यालयको कर्मचारी रजिस्टरमा अनुपस्थित दिनमा रातो कलम लगाएका हुन ।

उक्त दिनहरूको नियमानुसार तलब कटाई गर्न गाउँपालिकाका प्रमुख प्रशासकीय अधिकृत तथा लेखापाललाई अध्यक्षले जानकारी गराएका छन् ।

उक्त विद्यालयमा विद्यार्थीहरूलाई टिफिन सम्म मात्र अध्यापन गराउने गरेकोले गर्दा विद्यार्थीहरू टिफिन पश्चात विद्यालय नआउने गरेको विगत दई वर्ष देखि रहेको विद्यालयका शिक्षकहरू तथा कार्यालय सहायक र स्थानीय अभिभावकहरूले गाउँपालिका अध्यक्ष समक्ष गुनासो समेत गरे
।
विद्यालयको पढाई लेखाइ र सिकाइका अवस्था निकै दयनीय अवस्थामा रहेको त्यहाँका अभिभावक तथा केही कर्मचारीहरूले गुनासो गरे ।

ती जनगुनासोलाई मध्यनजर गर्दै भोलि देखि नै पूर्ण समय सम्म विद्यार्थीलाई अध्यापन गराउन निर्देशन अध्यक्ष महतोले दिए । साथै विद्यालयका विभिन्न पक्षहरूका सुधार गरी शिक्षाको गुणस्तरमा उल्लेखनीय सुधार गर्न शिक्षक, विद्यालय व्यवस्थापन समिति, वडा समिति, गाउँपालिका, अभिभावक तथा स्थानीय युवा बुद्धिजीवीले आ-आफनो जिम्मेवारी गम्भीरतापूर्वक निर्वाह गर्न अध्यक्ष महतोले आग्रह गरे ।