धनुषा प्रहरीले समाते गाडीसहित २७ लाख बढीको अवैद्य दारु

न्यूज ब्यूरो, जनकपुरधाम । जिल्ला प्रहरी कार्यालय धनुषाले २७ लाख बढी मूल्य बराबरको दारु बरामद गरी भन्सारमा बुझाएको छ ।

जिल्ला प्रहरी कार्यालय धनुषाबाट खटि गएको प्रहरी टोलीले धनुषा जिल्लाको नगराईन नगरपालिका वडा नम्बर ४ तुल्सियाही सडकखण्डबाट २७ लाख ५८ हजार मूल्य बराबरको अवैद्य दारु बरामद गर्न सफल भएको हो ।

सो सडक खण्डमा सवारी साधनहरू चेक जाँच गर्ने क्रममा जिल्ला धनुषा मुखियापट्टी मुसहरनिया गाउँपालिका वडा नम्बर ३ वस्ने वर्ष २३ को नुरे आलम शेषले चलाएको ज. १ च. १२६८ नम्बरको पिकअप गाडीमा सो मूल्य बराबरको दारु बरामद भएको हो ।

चोरी निकासी गरी भारत तर्फ लैजाने क्रममा गाडीमा दिलवाले नामक सोफी रक्सी ३०० कार्टुन रहेको र उनीसंग उक्त रक्सीको भ्याट विल माग गर्दा निजले अनुष्का टेड्रसको विल भौचर दिदा उक्त विल भौचरमा चालक नुरे आलम शेषले सो पिकप गाडी उल्लेख नभई ना. २ च. ३३१९ नम्बरको गाडी उल्लेख भएको देखिदा धनुषा प्रहरीको गस्ती टोलीले पक्राउ गरेको हो ।

नुरे आलम शेषलाई सोध पुछ गर्दा उक्त नम्बरको गाडीमा दिलवाले नामक सोफी रक्सी लोड गरी भारत तर्फ लगि रहेको भन्ने बताउँदा उनीसहित उक्त पिकअप गाडी र मदिरा समेत नियन्त्रणमा लिई कारवाहीको लागि आन्तरिक राजस्व कार्यालय जनकपुरधाम धनुषामा पठाएको हो ।