कमला नगरपालिकाको बजेट ५७ करोड बढी अनुमान, केही पक्ष असन्तुष्ट

न्यूज ब्यूरो, जनकपुरधाम । धनुषाको कमला नगरपालिकाको आगामी आर्थिक बर्षको लागि ५७ करोड बढी बजेट अनुमान गरिएको छ ।

शुक्रबार (जेठ १०) गते भएको छैठौँ नगरसभाबाट आगामी आर्थिक बर्ष २०७९/८० को बजेट ५७ करोड बढी अनुमान गरिएको हो ।

नगरपालिकाका नगर प्रमुख विशेश्वर यादवको अध्यक्षतामा भएको छैठौँ नगरसभाबाट कुल ५७ करोड ३६ लाख ५३ हजार रुपैयाँ बजेट अनुमान गरिएको हो । प्रमुख प्रशासकीय अधिकृत सुबोध कुमार ठाकुरको सभा सचिवको रुपमा उपस्थिति जनाएका थिए ।

जसमा वडास्तरीय बजेट कुल ६ करोड ३० लाख रुपैयाँ सिलिँग गरिएको पनि उल्लेख गरिएको छ । जसअनुसार, प्रत्येक वडाले बराबरी बाँडफाँड गरे कुल ७० लाख रुपैयाँको बजेट पाउने भएको छ ।

यद्यपी, नीति तथा कार्यक्रमको दौरान वडामा आवश्यकता बमोजिम अर्थ प्रवाह गरिने प्रमुख प्रशासकीय अधिकृत ठाकुरले बताए । उनका अनुसार, शाखागत बजेट २ करोड ५० लाख रुपैयाँ सिलिँग गरिएको हो ।

शाखागत बजेटकै कारण कमला नगरपालिकाको केही जनप्रतिनीधिहरु असन्तुष्टि जनाएका छन् । सो क्रममा कमला नगरपालिकाकी उपमेयर शिला देवी मण्डलले उपस्थिति जनाएनन् ।

नगरसभाको क्रममा वडा नं. १ को वडाध्यक्ष सरद देव यादव, वडा नं. २ को वडाध्यक्ष ठकु यादव, वडा नं. ३ को वडाध्यक्ष राम भगत यादव (भक्ति), वडा नं. ४ का वडाध्यक्ष पप्पु गोहिवार, वडा नं. ६ का वडाध्यक्ष मो. समसूल मियाँ र वडा नं. ८ का वडाध्यक्ष तृपित भुडेर यादव सहित कार्यपालिका सदस्यहरुको उपस्थिति रहेको थियो ।

नगरसभाको क्रममा वडा नं. ५ का वडाध्यक्ष शिवा पासवान, वडा नं. ७ का छठु मण्डल र वडा नं. ९ का रणवीर सिँह मण्डलको उपस्थिति थिएनन् ।

नगरसभाको लागि नगरपालिकाका प्रशासन / कृषि / पशु सेवा शाखा प्रमुख रबिन्द्र कुमार यादव, लेखापाल सँजीव कुमार महतो, जिन्सी शाखाका युगल किशोर यादवले विशेष भूमिका निर्वाह गरेका थिए ।

नगरसभाको लागि नीति तथा कार्यक्रम पशु तथा भेटेनेरी शाखा प्रमुख रबिन्द्र कुमार यादवले अन्य कर्मचारीको समन्वयमा तयार पारेका थिए ।