धनुषाधाम नगरपालिकामा सरकारले उपलब्ध गराउने थोरै मल किसानलाई वितरण नगरिने

न्यूज ब्यूरो, जनकपुरधाम । धनुषाको धनुषाधाम नगरपालिकाले किसानको माग बमोजिम मल खाद्य उपलब्ध नभए आउने न्यूनत्तम मल वितरण नगर्ने चेतवानी दिएको छ ।

धनुषाधाम नगरापालिकाभरिको किसानलाई पुग्ने गरी आवश्यकता अनुसार नै मल खाद्य उपलब्ध नगराएसम्म केही मात्रामा आउने मल खाद्य वितरण नगर्ने चेतावनी नगर प्रमुख बालेश्वर मण्डलले दिएका छन् । प्रत्येक वर्ष धान रोपनीकै समयमा मल खाद्यको अभाव हुने गरेको र सरकारले कोटा अनुसार मल खाद्य पठाउने गरेकोमा यसपाली सबै किसानलाई आवश्यकता बमोजिमको मल नपठाए पठाएको थोरै मल पनि थकथक राखिने चेतावनी दिएका छन् ।

यसको साथै, किसानहरुले समयमा माग बमोजिमको मल खाद्य नपाए त्यसबाट उत्पन्न हुने अवस्थाको सम्पूर्ण जिम्मेवारी सरकारले लिनुपर्ने बताएका छन् ।

मेयर मण्डलले सोमबार एक प्रेस विज्ञप्ति जारी गर्दै किसानको आवश्यकता अनुसार मल खाद्य उपलब्ध नभएर सृजना हुने अवस्थाको जिम्मेवारी नेपाल खाद्य सँस्थान र प्रदेश सरकारले लिनुपर्ने चेतावनी दिएका छन् ।