मधेश प्रदेशको वीरगँजमा मुस्लिमहरुले 'अल्लाह हुअकबर' भन्दै गरे भारतीय नेतृ शर्माको विरोध

न्यूज ब्यूरो, वीरगँज । मधेश प्रदेशको वीरगँजस्थित मुस्लिम समुदायले भारतीय नेतृ नुपुर शर्माको विरोधमा वृहत रयाली गरेको छ ।

भारतीय जनता पार्टी (भाजपा) की राष्ट्रिय प्रवक्ता समेत रहेकी नेतृ नुपुर शर्माले मुस्लिम धर्मको बारेमा दिएको विवादित बयानपछि विश्वभरिका मुस्लिम देशहरुले शर्मा विरुद्ध आन्दोलित भएका छन् ।

सोही क्रममा धर्म निरपेक्ष रहेको नेपालमा समेत मुस्लिमहरुले नुपुर शर्माको विरोधमा बृहत रयाली निकालेको छ । नेपालको झण्डा अँकित बैनरमा नेतृ शर्माको विरोध जनाएको हो ।

मुस्लिम धर्मावलम्बीहरुको पैगम्बर मोहम्मदको बारेमा दिएको विवादस्पद अभिव्यक्तिपछि मुस्लिम देशहरुमा विरोध जनाउँदै आएको शुक्रबार वीरगँजमा पनि विरोध जुलुस निकालिएको हो ।

यी बाहेक मुस्लिम देशहरूको संस्था अर्गनाइजेसन अफ इस्लामिक कोअपरेसन (ओआईसी) ले पनि असन्तुष्टि व्यक्त गरेको छ ।

बीजेपी प्रवक्ता नुपुर शर्माले पैगम्बर मोहम्मदको बारेमा दिएको विवादास्पद बयानको निन्दा गर्दै साउदी अरबले विज्ञप्ति जारी गरेको छ ।

यसअघि कतार, इरान र कुवेतले पनि नुपुर शर्माको भनाइप्रति कडा आपत्ति जनाएका थिए । साउदी अरेबियाले सबै धर्म र आस्थाको सम्मान गर्नुपर्ने बताएको छ ।

त्यस्तै, अफगानिस्तानको तालिबान सरकारले ’भारतको सत्तारूढ दलका नेताद्वारा पैगम्बर मोहम्मद विरुद्ध अपमानजनक शब्दहरू प्रयोग गरेको कडा निन्दा गरेको छ ।

५७ मुस्लिम देशको संगठन अर्गनाइजेसन अफ इस्लामिक कोअपरेसन (ओआईसी) ले पैगम्बर विरुद्धको बयानको विषयमा आपत्ति जनाएको छ ।