एकै परिवारको पाँच जना घरमै झुण्डिएको अवस्थामा फेला, छोरी बिहेको लागि लिएको थियो कर्जा

न्यूज ब्यूरो, जनकपुरधाम । छोरी बिहेको लागि कर्जा लिएका एक परिवारले आर्थिक अभावकै कारण मृत्यूवरण रोजेको तथ्य बाहिर आएको छ । एकै परिवारको पाँच जना झुण्डिएको अवस्थामा फेला परेको हो ।

छिमेकी मुलुक भारतको बिहार राज्यस्थित समस्तीपुर जिल्लाको एक परिवारले एउटै घरमा एकै ठाउँमा पाँच जना झुण्डिएको अवस्थामा फेला परेको हो ।

यो घटना विद्यापतिनगर प्रहरी चौकी क्षेत्रको मउ धनेशपुर दक्षिण गाउँको हो । आर्थिक अभावका कारण परिवारले मृत्यू रोजेको स्थानीयहरु बताउँछन् ।

मृत्यु हुनेमा ४२ वर्षीय मनोज झा, ३८ वर्षीय सुन्दरमणि, ६५ वर्षीया सीतादेवी, १० वर्षीय सत्यम र ७ वर्षीय शिवम रहेका छन् ।

जानकारीका अनुसार मनोज यस घरमा श्रीमती सुन्दरमणि, आमा सीतादेवी र छोराछोरी सत्यम र शिवमसँग बस्दै आएका थिए । मनोजका दुई छोरी पनि छन्, जसमध्ये एउटी छोरी निभा श्रीमानसँगै माइती आएकी थिइन् ।

आफु र श्रीमान् अर्को कोठामा सुतेको निभाले बताइन् । बिहान उठ्दा छेउको कोठा खुला रहेको र घरका पाँच जनाको शव झुण्डिएको देखे ।

शव देखेपछि उनीहरू चिच्याउन थाले, जुन सुनेर वरपरका मानिसहरू पनि जम्मा भएका थिए ।

तत्कालै प्रहरीलाई खबर गरियो । प्रहरीले पाँचै जनाको शव नियन्त्रणमा लिएर पोष्टमार्टमका लागि पठाएको छ । यो घटनापछि इलाकामा तनाब मच्चिएको छ । घटनास्थल नजिक मानिसहरुको भीड जम्मा भएको थियो । प्रहरीले ठूलो मुस्किलले भीडलाई हटायो।

दलसिंहसराहका एसपी हृदयकान्तले पोष्टमार्टमको रिपोर्ट आउन बाँकी रहेको बताए । त्यसपछि मात्र मृत्युको वास्तविक कारण थाहा हुन्छ । मृतकले ऋण लिएको प्रारम्भिक अनुसन्धानबाट खुलेको छ ।

मनोजले छोरीको बिहेका लागि ऋण लिएका थिए । परिवारमा ऋणको दबाब थियो, जसका कारण उनीहरू निकै चिन्तित थिए । आर्थिक अभावका कारण घरपरिवार निकै कष्टकर भएको छिमेकीले बताएका छन् ।