धनुषामा आर्मी क्याम्पको १०० मिटर नजिकै बम विस्फोट, के भने विप्लव ?

न्यूज ब्यूरो ||
जनकपुरधाम, २२ चैत्त । आज विहानै धनुषाको धारापानीमा भएको बम विस्फोट नेपाल आर्मी क्याम्पको करिब १०० मिटरको दुरीमा मात्र भएको छ ।

धनुषाधाम नगरपालिका वडा नं. ९ धारापानी र भिमानको बीचमा आर्मी क्याम्पको नजिकै बम विस्फोट भएको हो ।

पान परागको बट्टामा बारुद हालेर विस्फोट गराइएको भन्दै विस्फोटमा परी स्थानीय ६४ बर्षिय तिर्थमाया तामाङगको हात र खुट्टामा गम्भिर चोट लागेको छ ।

आर्मी क्याम्पको नजिकै आफ्नै फूलबारीमा काम गर्न गएकोब बेला भएको बम विस्फोटमा परी तामाँगको हात र खुट्टा फाटेको देखिएको छ ।

बम को र किन विस्फोट गराएको हो भन्ने यकिन हुन नसकेको हो भने यस घटनाको बारेमा थप जानकारी आउन बाँकी छ ।

घाईते तामाँगको उपचार स्थानीय अस्पतालमा भईरहेको छ भने माओवादी विप्लवका जिल्ला अध्यक्ष राजु कार्कीले आफूहरुको त्यो बम विस्फोटमा कुनै प्रकारको सँलग्नता नरहेको न्यूज ब्यूरोलाई फोन सम्पर्क मार्फत भने ।

विगत केही दिनदेखि यस्ता घटनाहरुमा माओवादी विप्लवको हात रहेको भन्दै उसकै कार्यकर्ताले बम विस्फोट गराएको हुनुपर्ने आशँकालाई चिर्दै कार्कीले कुनै पनि प्रकारको सँलग्नता नरहेको प्रष्टयाएका छन् ।