स्थानीयको कुटपिटबाट वडाध्यक्षको मृत्यु

न्यूज ब्यूरो, पाँचथर, १७ चैत्र । स्थानीय बासिन्दाको कुटपिटबाट पाँचथरको हिलिहाङ गाउँपालिका वडा नम्बर ७ का वडाध्यक्ष तीर्थराज तिम्सिनाको मृत्यु भएको छ । कुटपिटबाट शारीरिक र मानसिक रुपमा कमजोर भएका वडाध्यक्ष तिम्सिनाको मृत्यु भएको छ ।

उनलाई उपचारका लागि फिदिमस्थित पाथीभरा अस्पतालमा भर्ना गरिएको थियो । त्यहाँबाट चिकित्सकले थप उपचारका लागि रिफर झापा लैजादै गर्दा उनको मृत्यु भएको प्रहरीले जनाएको छ ।

गत चैत ११ गते सडक निर्माणका क्रममा स्काभेटर लगाउँदा घरमा जोड्ने बिजुलीको तार छिनेको विषयलाई लिएर स्थानीय भीम योक्पाङदेन र उनका छोरा सुवास योक्पाङदेनले तिम्सिनालाई कुटपिट गरेका थिए । उनी हिलिहाङ–७ स्थित तम्फुला सडक आयोजनाको अनुगमनका क्रममा त्यहाँ पुगेका थिए ।

तिम्सिनाले आफूमाथि भएको कुटपिटविरुद्ध प्रहरीमा उजुरी समेत दिएका थिए । उनलाई कुटपिट गर्नेहरुलाई प्रहरीले खोजी गरिरहेको बताएको छ ।