धनुषाः रक्सी पसलमा प्रहरीको छापामारी, १८ वटा मोटरसाईकलसहित लाखौँको रक्सी पक्राउ

न्यूज ब्यूरो, जनकपुरधाम । धनुषाको एक रक्सी पसलमा नेपाल प्रहरी र सशस्त्र प्रहरीले लगातार छापामारी गरी लाखौँको समान पक्राउ गरेको छ ।

पूर्वी धनुषाको जनकनन्दिनी गाउँपालिकाको वडा नम्बर १ ईनर्बास्थित बुधबार (आज) साँझ करिब ६ः२५ बजेको समयमा रक्सी पसलमा छापामारी गरी लाखौँको रक्सी पक्राउ गरेको हो ।

नेपाल भारतको सीमासँगै रहेको इनर्बास्थित सँचालनमा रहेको पिन्टु कुमार यादवको रक्सी पसलबाट १८ वटा मोटरसाईकलमा लोड गरी राखिएको ३ लाख मूल्य बराबरको रक्सी पक्राउ गरेको हो ।

सशस्त्र प्रहरी बल नेपाल बिओपी ईनरबाका ईन्चार्ज एवम् प्रहरी नीरिक्षक शम्भु कटुवाल र जिल्ला प्रहरी कार्यालय धनुषाको प्रहरी नीरिक्षक विक्रम साहको कमाण्डमा खटि गएको सँयुक्त टोलीले यादवको पसलमा भारत लैजान तयारी अवस्थामा राखिएको १८ वटा मोटरसाईकल समेत नियन्त्रणमा लिएको छ ।

सो १८ वटै मोटरसाईकलमा ३ तीन लाख मूल्य बराबरको रक्सी लोड गरि राखिएको थियो । गोप्य सूचनाको आधारमा सशस्त्र प्रहरी र नेपाल प्रहरीको सँयुक्त टोलीले छापामारी गर्दा १७ लाखको मोटरसाईकल र ३ लाखको रक्सी गरी करिब २० लाख मूल्य बराबरको समान पक्राउ गर्न सफल भएको हो ।

सशस्त्रका ईन्सपेक्टर शम्भु कटुवाल र जिप्रका धनुषाका ईन्सपेक्टर विक्रम साहको कमाण्डमा खटि गएको ११ जनाको प्रहरी टोलीले पसलमा छापामारी गरेको थियो ।

छिमेकी मुलुक भारतको बिहार राज्यमा मदिरा प्रतिबन्ध भएपछि बिहारीहरु बिहान ३ बजेदेखि नै रक्सी खान नेपाल आउने गरेको छ । सीमासँगै रहेको गाउँमा प्रायः रक्सी पसल सीमामै सँचालनमा रहेको छ ।

बिहारमा रक्सी प्रतिबन्ध भएपछि बिचौलिया, बिलोकियाहरुले नेपालबाट रक्सी लादेर भारततर्फ महँगोमा बेच्न लैजाने गरेको छ । नेपालतर्फबाट पनि बिलोकियाहरु, तस्करहरुले रक्सी तस्करी गर्दै आएको छ ।

नेपाल प्रहरीले बिहार प्रहरीसँग समन्वय गरी सीमा सुरक्षामा थप कडाई गरी सहयोग गर्दै आएको छ । सोही क्रममा भारी मात्राको रक्सी छापामारी गरी पक्राउ गरेको बिओपी इनरबाका प्रहरी ईन्सपेक्टर कटुवालले जनाए ।