डेढ हप्तामै फेरी बढयो पेट्रोलको दाम, अब पेट्रोको मूल्य कति ?

न्यूज ब्यूरो, जनकपुधाम । गत फागुन ७ गते मात्र पेट्रोलिम पदार्थको मूल्यवृद्धि गरेको नेपाल आयल निगमले आज पुनः दाममा वृद्धि गरेको छ ।

विहिबार नेपाल आयल निगमले पेट्रोलियम पदार्थको मूल्यवृद्धि गरेको छ । निगम सञ्चालक समितिको बैठकले आज राति १२ बजेदेखि लागू हुने गरी पेट्रोल, डिजेल र मट्टितेलको मूल्यमा प्रतिलिटर रु पाँचले वृद्धि गरेको हो ।

मूल्य बढेसँगै काठमाडौँ उपत्यकामा पेट्रोलको बिक्री मूल्य प्रतिलिटर रु १५०, डिजेल र मट्टितेलको मूल्य प्रतिलिटर रु १३३ पुगेको छ ।

यस्तै निगमले आन्तरिकतर्फको हवाई इन्धनको मूल्य प्रतिलिटर रु १० र अन्तर्राष्ट्रियतर्फ हवाई इन्धनको मूल्य प्रतिकिलोलिटर १०० अमेरिकी डलर वृद्धि गरेको छ । निगमले एलपी ग्यासको मूल्य भने यथावत राखेको छ ।

गत फागुन ७ गते मात्र निगमले पेट्रोलको मूल्य १ सय ४५ रुपैयाँ कायम गरेको थियो भने ५ रुपैयाँ बढाएर १५० पुरयाएको छ ।