मारुती सिमेन्ट फ्याक्ट्रीमा एक इन्जिनीयरको खसेर मृत्यू, फ्याक्ट्रीमा हडताल

न्यूज ब्यूरो, सिरहा । सिरहा जिल्लास्थित रहेको मारुती सिमेन्ट फ्याक्ट्रीमा काम गर्ने एक ईन्जिनीयरको खसेर मृत्यू भएको छ ।

उद्योगको लापर्वाहीका कारण सिरहाको मारुती सिमेन्ट उद्योगमा कार्यरत एक मजदुरको मृत्यु भएको हो ।

उद्योगमा प्रोजेक्ट साईडको एसआरएम ईन्जिनियरको रुपमा कार्यरत वेल्डर सरुवारानी गाउँपालिका वडा नम्बर ६ प्यूठान का २८ वर्षिय बेच बहादुर पुण मगरको काम गरिरहेको अबस्थामा फलामे पाइपले टाउकोमा लागेर मृत्यु भएको हो ।

काम गरिरहेको अवस्थामा चेनपुल्लिले माथि तानिरहेको फलामे पाइप झरेर टाउकोमा लाग्दा मगरको घटनास्थलमै मृत्यु भएको ट्रेड युनियन महासंघका जिल्ला अध्यक्ष रामपुकार कामतिले जानकारी दिए ।

पुनको मृत्यु पछि विहानै देखि मजदुरहरुले घटनाको छानविन गरी लापर्वाही गर्नेलाई कार्वाहीको माँग राख्दै उद्योग बन्द गरेको छ ।

उद्योगले कामदारहरुलाई अपनाउनु पर्ने आवस्यक सुरक्षा प्रवन्ध नमिलाएका कारण दुर्घटना हुने गरेको अध्यक्ष कामतीको आरोप रहेको छ ।

उद्योगले त्यहाँ कामगर्ने मजदुरहरुलाई सामान्य हेलमेटको समेत व्यवस्था नगरेको बताइन्छ । यता, उद्योगले दुर्घटनामा परि मृत्यु भएको वताएको छ ।

मृतक मगरका श्रीमती रिना पुन मगरले घटनाको उचित छानविनको माँग सहित उजुरी गरेको बताइएको छ ।

यता, जिल्ला प्रहरी कार्यालय सिरहाले मजदुरको लडेर मृत्यु भएको जनाएको छ । जिल्ला प्रहरी कार्यालय सिरहाका सूचना अधिकारी सुवास बुढाथोकीले भने, ‘मैले कामगर्ने क्रममा लडेर मृत्यु भएको जानकारी पाएको छु, घटनाबारे थप अनुसन्धान भईरहेको छ ।’

शव पोष्टमार्टमको लागि रामकुमार उमाप्रसाद स्मारक अस्पताल लहानमा राखिएको जनाएको छ ।