जनकपुरकी उपमेयर "झा" उपर यस्तो आरोप, अदालत जाने चेतावनी

न्यूज ब्यूरो ||
जनकपुरधाम, १३ चैत्त । प्रदेश २ को अस्थायी राजधानी जनकपुरकी उपमेयर रिता झा उपर अदालतको अपहेलना गरी घर तोडफोड गरेको आरोप लगाइएको छ ।

जनकपुर उपमहानगरपालिकाकी उपमेयर झाले उच्च अदालत जनकपुरले तोकिएको सीमाभित्र कुनै प्रकारको हस्तक्षेप नगर्न आदेश गरेपनि बलपूर्वक बुलडोजर चलाएर घर भत्काएको आरोप लगाइएको छ ।

जनकपुर उपमहानगरपालिका वडा नं. २ कदमचोकमै रहेको रघुनन्दन मण्डल (मिठु) ले आफ्नो ५ धुर २ कन्मा जग्गाभित्र कुनै प्रकारको हस्तक्षेप नगर्न उच्च अदालतले आदेश दिएको भएपनि उपमेयर झाले आफूले अदालतको निर्णयलाई नमान्ने भन्दै बल जबरदस्ती घर भत्काएको आरोप लगाएका छन् ।

मँगलबार न्यूज ब्यूरोसँग कुरा गर्दै मण्डलले - 'कदमचोकमा आफ्नै जमिनमा पसल थापेर बसेको थिए, नगरपालिका कार्यालयले सुचना पनि जारी गरयो, त्यसै अनुसार मुख्य नालाबाट २ फिट भित्रसम्म हामी आफनो सबै थोक हटाईसकेका थियौँ, अदालतले चैत्त १५ गते हाजिर हुन तारेख पर्चा समेत काटेको छ, त्यो बीचमा कुनै प्रकारको हस्तक्षेप नगर्न आदेश पनि गरेको छ, तर उपमेयर झाले अदालतको अपहेलना गर्दै घर भत्काईन् , जनप्रतिनीधि हुँदैमा जे पनि गर्न पाईन्छ र ? हामी अदालत गुहार्छौ र न्याय माग्छौं ।' उनले भने ।

के छ आरोप हेर्नुहोस भिडियोमा

उच्च अदालत जनकपुरले गरेको आदेशमा - 'निवेदकले अन्तिरिम आदेशको माग गरेतर्फ आदेश जारी हुने नहुने सन्दर्भमा हेर्दा निवेदनमा उल्लेखित किता नं. १११ को ०–०–५–२ जग्गा निवेदक मध्ये राज कुमारी मण्डलको पति स्वर्गित गोपाल मण्डलको नाउँमा स्व. वासी बसोबास जनाई जनई नापी भएको देखिएको र उक्त जग्गामा घर बसोबास गरि आएको भन्ने पेश भएका छवि चित्र र घरको घरधुरी कर बुझाएका कागजात समेतबाट देखिन आएको हुँदा उक्त कित्ता नं. १११ को ०–०–५–२ जग्गा र सो जग्गाभित्र रहेका घरमा कुनै प्रकारले हस्तक्षेप गर्न, गराउन नपाउने गरी उच्च अदालत नियमावली, २०७३ को नियम ४२ (१) बमोजिम अन्तरिम आदेश जारी गरिदिएको छ , सो को सुचना विपक्षीहरुलाई दिनु ।' भनेर उल्लेख गरिएको छ ।

मण्डलले उमेयर झाले उच्च अदालतको अपहेलना गरेको भन्दै आफू न्याय खोज्न पुनः अदालत सम्म जाने बताएका छन् ।

उता, उपमेयर रिता झासँग यसबारे सम्पर्क गर्दा व्यस्तता जनाएका थिइन् ।