लोकसेवा र जनकपुर रेल्वेमा नोकरी लगाईदिने भन्दै ठगी गर्ने चौधरी पक्राउ

न्यूज ब्यूरो, जनकपुरधाम । लोकसेवा सहित जनकपुर रेल्वेमा नोकरी लगाईदिने भन्दै ठगी गरेको युवकलाई धनुषा प्रहरीले पक्राउ गर्न सफल भएको छ ।

विभिन्न व्यक्तिहरुसँग जनकपुर रेल्वे सहित लोकसेवामा समेत नोकरी लगाईदिने भन्दै रकम उठाएर ठगी गरेको आरोपमा उनलाई प्रहरीले पक्राउ गरेको हो ।

लोकसेवा आयोग पास नै नभएका व्यक्ति तथा रेल्वेमा समेत नक्कली नियुक्ती पत्र देखाएर ठगी गर्ने प्रदेश नम्बर २ को महोत्तरी जिल्लाको पिपरा गाउँपालिका वडा नम्बर ७ दनौली बस्ने ३२ बर्षिय सागर कान्त चौधरी रहेको प्रहरीले जनाएको छ ।

जिल्ला प्रहरी कार्यालय धनुषाका अनुसार, चौधरीलाई प्रहरीले जनकपुरधाम उपमहानगरपालिका वडा नम्बर ८ रामानन्दचोकस्थित रहेको होटल सीता प्यालेस अगाडीबाट आईतवार राति पक्राउ गरेको हो ।

विभिन्न व्यक्तिलाई रेल्वे कम्पनी लिमिटेडको नाममा कर्मचारी नियुक्त गरेको नियुक्तिपत्र उनको साथबाट प्रहरीले बरामद गरेको छ ।

प्रहरीका अनुसार चौधरीको साथबाट लोक सेवा आयोग न्युक्ति नतिजा प्रकाशन शाखा, नेपाल रेल्वे कम्पनी लिमिटेड कम्पनी लेखिएको पाना, नेपाल रेल्वे कम्पनी लिमिटेड संतोष रायको नामको नियुक्ति पत्र पाना, संतोष रायकै नामको शपथ ग्रहण पाना, लोक सेवा आयोग नियुक्ति नतिजा प्रकाशन शाखा, नेपाल रेल्वे कम्पनी लिमिटेड लेखिएको पत्र पाना, नेपाल रेल्वे कम्पनी लिमिटेड शंकर यादवको नामको नियुक्ति पत्र पाना, शंकर यादवकै नामको सपथ ग्रहण पाना, नेपाल ईन्भेष्ट बैंक लि।को राजेश कापरको नाउको दस्तखत भएको खाली चेक २ वटा, पर्सा जिल्ला अदालत विरगंज लेखिएको रबर स्टाम्प छाप बरामद भएको छ ।

लोक सेवा आयोग तथा नेपाल रेल्वे कम्पनी लिमिटेडको नक्कली कागजातहरु तयार गरी स्थानिय मानिसहरुलाई ठगी गर्न भनी आफुले लोक सेवा आयोग तथा नेपाल रेल्वे कम्पनी लिमिटेडको पदाधिकारी तथा कर्मचारी रहेको भनी नक्कली नियुक्ति पत्र तयार गरी बाँडेको चौधरीले प्रहरी समक्ष स्वीकारेका छन् ।

धनुषा जिल्ला अदालतबाट लिखत सम्बन्धी कसुर मुद्दा शिर्षकामा ७ दिनको म्याद लिएर चौधरीमाथि थप अनुसन्धान गरिरहेको जिल्ला प्रहरी कार्यालय धनुषाले जनाएको छ ।

उनले सयौं व्यक्तिलाई ठगेको जिल्ला प्रहरी कार्यालय धनुषाले जारी गरेको प्रेस वक्तत्वमा उल्लेख छ ।