गहुँको बीउ नदिँदा जनकारवाही गरेको किसानको पक्षमा उभे जनमत पार्टी, गाउँपालिकामा तालाबन्दी

न्यूज ब्यूरो, सिरहा । सिरहाको औरही गाउँपालिकामा असल किसानलाई गहुँको बीउ नदिदा लुटेको आरोपमा प्रहरीले किसानलाई पक्राउ गरेको भन्दै जनमत पार्टीले किसानको साहारा बनेका छन् ।

औरही गाउँपालिकामा गत मँगलबार किसानहरुको लागि ल्याएको गहुँको बीउ साधारण तरिकाले नदिएपछि किसानहरुले आफ्नो हक भन्दै गहुँको बीउ गाउँपालिकाको स्टोरबाट आफैँ लिएको थियो ।

सो क्रममा चार जना किसानको नाम किटान गरी स्थानीय प्रहरीले मुद्दा लगाउने भएपनि डा. सिके राउत नेतृत्वको जनमत पार्टीले विरोध जनाउँदै गाउँपालिकामा तालाबन्दी गरेको छ ।

गहुँ लिने दर्जनौ किसानहरुमध्ये स्थानीय मिथिलेश यादवलाई पक्राउ गरेको छ । प्रहरीले उनलाई सार्वजनिक उपद्रवको मुद्दा लगाउने तथा अन्य तीन जनामाथि सोही मुद्दा चलाउने जानकारी पाएपछि जनमत पार्टीका नेता कार्यकर्ताहरुले किसानको पक्षमा उभिएका छन् ।

उनीहरुले किसान पक्राउको विरोध गर्दै शुक्रबार दिउँसो पूर्व पश्चिम राजमार्ग अन्तर्गत सिरहाको धनगढीमाई नगरपालिका वडा नं. ८ कसहा बजारस्थित २ घण्टा चक्काजाम समेत गरेका छन् ।

जनमत पार्टीका नेता दीपेन्द्र यादवको अगुवाईमा जनमत पार्टीका नेता कार्यकर्ताहरुले शुक्रबार दिउँसो गाउँपालिकाको कार्यालयमा तालाबन्दी गरेको हो । उनका अनुसार, गाउँपालिकाले दिएको उजुरीको आधारमा प्रहरीले किसानलाई पक्राउ गरेकाले गाउँपालिकाको कार्यालयमा तालाबन्दी गरेको बताए ।

उनले पक्राउ परेका किसानलाई रिहा नगरे अझ आन्दोलनमा उत्रिने चेतावनी दिए । उनले भने, ‘गाउँपालिकाले अविलम्ब किसानमाथि दर्ता गराएको मुद्दा फिर्ता लिओस् । होइन भने महाविद्रोह हुन्छ ।’

प्रहरी प्रशासन र गाउँपालिका अध्यक्ष सिदार्थ यादवविरुद्ध किसानहरुले नारासमेत लगाएका छन् । उनीहरूले किसानमाथि गरिएको दमन बन्द गर, किसानलाई आवश्यक मल खाद र बीउको व्यवस्था गर, गिरफ्तार किसानलाई रिहा गरलगायतका नारा लगाएका छन् ।

किसानको लागि आएको गहुँको बीउ स्थानीय जनप्रतिनीधिहरुले आफ्ना पार्टीका कार्यकर्ताहरु, आसेपासेहरुलाई मात्र दिने मनसायले असल किसानलाई दिनभरी कुराएको भन्दै किसानहरुले गरेको कार्य बाध्यता रहेको उनले प्रतिक्रिया दिए ।

उनले भने, –“किसानहरुले गरेको कार्य उचीत नहुन सक्छ, तर बाध्यता कसले सृजना गर्यो ? असल किसानको लागि आएको बीउ किसानले समयमै पाउनुपर्छ, दिनभरी कमाएर साँझ एक छाक खाने किसानहरुलाई दिनभरि लाईनमा बसाएर बीउ नदिएपछि त्यस्तो अवस्था सृजना भयो । र यसको जिम्मेवारी पनि जनप्रतिनीधि, गाउँपालिका स्वयँम हो ।”

चारजनामाथि मुद्दा चलाएको भन्दै त्यो मुद्दा फिर्ता नगरे र किसानहरुको घरमा अझै प्रहरी गए विद्रोहको चेतावनी दिए । उनले भने, –“कृषी प्रधान देशमा, हामी किसानको साथ छौँ ।