पशुपंक्षीपालन सहकारी संघ र केन्द्रीय मत्स्य सहकारी संघबीच एकिकरण हुँदैछः अध्यक्ष साह

न्यूज ब्यूरो, जनकपुरधाम । दुई विषयगत केन्द्रीय सहकारी संघहरु एकीकरण हुने भएका छन् ।

केन्द्रीय पशुपंक्षीपालन सहकारी संघ लि. नेपाल र नेपाल केन्द्रीय मत्स्य सहकारी संघ लि. बीच एकीकरण हुने भएको हो ।

एकीकरणका लागि सहकारी विभागबाट पूर्व स्वीकृति पत्र प्राप्त भएसँगै दुबै संघलाई एकीकरणमा जान बाटो खुलेको हो ।

केन्द्रीय मतसय सहकारी संघ लि. नेपालका अध्यक्ष सन्जय कुमार साहले सहकारी विभागबाट २०७८ असोज २९ गते पूर्व स्वीकृति पत्र प्राप्त भएको जानकारी गराउनुभयो ।

अध्यक्ष साहले तराई क्षेत्रका जिल्लाहरुका तालिमहरु सञ्चालन गर्ने क्रममा मत्स्यपालन सहकारी संघका पदाधिकारीहरुसँग भेट हुँदा एकीकृत रुपमा दरिलो बनेर अघि बढ्नुपर्छ भन्ने मनसाय व्यक्त गरिएपछि आफुहरु पनि इच्छुक भएको बताउनुभयो ।

सोही अनुरुप दुबै संघको सञ्चालक समितिले मर्जको बिषयलाई सकारात्मक रुपमा लिई संयुक्त कार्यदल गठन गरेको थियो ।

कार्यदलले तयार पारेको प्रतिवदेनका आधारमा २०७८ साल असोज ६ गते संघीय सहकारी विभागमा एकीकरण पूर्व स्वीकृतिका लागि पत्राचार गरिएको थियो ।

मत्स्यपालन केन्द्रीय संघको गत वर्ष निर्वाचनसहितको साधारण सभाले एकीकरणको विषयलाई अनुमोदन गरेको थियो भने केन्द्रीय पशुपंक्षीपालन सहकारी संघको पनि हालै सम्पन्न साधारण सभाले मर्जरलाई अनुमति प्रदान गरेको थियो । प्रत्युत्तरमा सहकारी विभागबाट दुवै सँस्थाबीच एकिकरणको लागि स्वीकृति दिएको हो ।

एकीकृत संघको नाम केन्द्रीय पशुपंक्षी मत्स्य सहकारी संघ लि. नेपाल नाम प्रस्ताव गरिएको छ । यद्यपि, दुवै संघको संयुक्त साधारण सभामार्फत सबै कुरो टुङ्गो लाग्ने नेपाल केन्द्रीय मतसय सहकारी संघ लि।का अध्यक्ष साहले जानकारी गराउनुभयो ।

‘एकीकरण कार्यविधि तथा संयुक्त साधारण सभाको निर्णयको आधारमा बाँकी विषयहरु तय गर्छौ,’ उहाँले भन्नुभयो, ‘दुवै संघबाट तदर्थ समिति गठन हुन्छ । एकीकृत विनियम र कार्यविधि पास भएपछि अरु कुरोहरु टुङ्गो लाग्छ ।’ त्यसका लागि चाँडै नै संयुक्त साधारण सभा गर्ने तयारीमा जुट्ने अध्यक्ष अधिकारीले बताउनुभयो ।