जलेश्वरका मेयर मिश्रको सरकारी गाडी खै ?

न्यूज ब्यूरो, जलेश्वर । महोत्तरी जलेश्वरका मेयर राम शँकर मिश्रले चढने सरकारी गाडी विगत २५ दिनदेखि अर्कै ठाउँमा थन्काइएको छ ।

गत असोज १८ गते करिब २ः२० बजेको समयमा बर्दिवासबाट जनकपुरतर्फ आउँदै गरेको मेयर मिश्रले चढने सरकारी गाडी दुर्घटना हुन पुग्यो । मिथिला नगरपालिका वडा नं. १० लालगढस्थित भएको सो दुर्घटनामा मेयरको गाडी क्षतिग्रस्त भयो ।

तर, त्यो दिन सरकारी गाडीमा एउटा नै सरकारी व्यक्ति थिएनन् । जलेश्वरका मेयर आफैँ भारतको राजधानी दिल्ली हुँदा उनका एक आफन्तले चलाएको सो सरकारी गाडी दुर्घटना भएपनि घटना गुपचुप राख्ने प्रयास गरिएको छ ।

मेयरले चढने सरकारी गाडी उनका आफन्त भनिने जय प्रकाश साहले सो दिन गाडी चलाएका थिए । सरकारी गाडी सरकारी कार्य बाहेक अन्य प्रयोजनमा प्रयोग गर्नको लागि कम्तीमा जिल्ला प्रशासन कार्यालयबाट स्वीकृति लिनुपर्नेमा जिल्ला प्रशासन कार्यालय महोत्तरीलाई पनि जानकारी छैनन् ।

मेयर आफैँ बाहिर हुँदा जय प्रकाश साहले मेयरकै आफन्तलाई घुमाउनको लागि लैजाँदै गर्दा दुर्घटनामा परेको बुझिएको छ । यद्यपी, गाडीमा सो दिन को को रहेको कुरा खुलेको छैनन् ।

प्रहरी चौकी लालगढका अनुसार, गत असोज १८ गते पूर्वपश्चिम राजमार्ग अन्तर्गत लालगढस्थित बर्दिबासबाट ढल्केवरतर्फ जाँदै गरेको सरकारी गाडी र ढल्केवरबाट बर्दिवासतर्फ गईरहेको एक नीजि ट्रयाक्टरले ठक्कर दिएपछि सवारी क्षतिग्रस्त हुन पुगेको थियो ।

सो सन्दर्भमा जलेश्वरका मेयर राम शँकर मिश्रले भने बेग्लै प्रतिक्रिया दिए । उनका अनुसार, गाडीको सर्भिसिँगको समय भएकोले सर्भिसिँगको लागि काठमान्डौँ जाँदै गर्दा बाटोमा ट्रयाक्टरले ठक्कर दिएको र सबै खर्च समेत ट्रयाक्टरबालासँग तिर्न लगाएको बताए ।

सरकारी गाडीमा सरकारी प्रयोजन, सार्वजनिक प्रयोजन बाहेक अन्य प्रयोजनमा प्रयोग गर्न नमिल्ने प्रावधान रहेपनि मेयर मिश्रले आफ्ना आफन्तलाई ओहोर दोहोर गर्नको लागि जय प्रकाश साहलाई सवारी चलाउन दिएका थिए । सो दिन गाडीमा कोही पनि कर्मचारी वा जनप्रतिनीधि थिएनन् ।

सो दुर्घटनाको क्रममा एक जना पुरुष घाईते भएको थियो । समान्य घाईते भएका ती पुरुष भने कसको आफन्त वा को रहेको बारे खुलेको छैनन् । यता, जानकारी अनुसार, चालक जय प्रकाश साहले आफ्नो आफन्तलाई घुमाउन लैजाने क्रममा दुर्घटना भएको बुझिएको छ ।

दुर्घटनापछि कैयौँ दिनसम्म प्रहरीको कब्जामा रहेको मेयरको गाडी ट्रायक्टर मालिकले खर्च स्वीकारेपछि मात्र गाडी जान दिएको थियो । तर, अझै पनि सरकारी गाडीको अवस्था गुपचुप राखिएको छ ।

जिल्ला प्रशासन कार्यालय महोत्तरीले मेयरको सरकारी गाडी दुर्घटना बारे कुनै जानकारी नभएको बताएको छ ।