तीनै तहका सरकारले किसानलाई यथाशिघ्र मदत गर्नुपर्छः नेता साह

न्यूज ब्यूरो, जनकपुरधाम । लोकतान्त्रिक समाजवादी पार्टी (लोसपा) का नेता सँजय कुमार साहले बेमौसमी बर्षाका कारण क्षतिग्रस्त भएको किसानको सपनालाई तीनै तहका सरकारले साकार पार्नुपर्ने आवश्यकता औल्याएका छन् ।

अबिरल बर्षाका कारण खेतमै भिजेको धान बालीले किसानहरु मार्कामा परेको बेला केन्द्र सरकार, प्रदेश सरकार र स्थानीय सरकार गरी तीनै तहबाट राहतको व्यवस्था गर्नुपर्ने धारणा राखेका छन् ।

धनुषामा लाखौँ हेक्टरमा लगाइएको धान घर भित्र्याउने तर्खरमा रहँदा आएको बर्षाले किसानको सबै धान बाली नोक्सान भएको बताउँदै यसमा तीनै तहको सरकारले आ आफ्नो स्तरबाट मदत गरे उनीहरुको घाउमा मलहम महसुस हुने बताएका छन् ।

धनुषाको जिल्लाको विभिन्न स्थानमा बर्षाको कारण भएको डुबान र काटिएर राखिएको धानमा व्यापक क्षति पुगेको बताउँदै तत्कालै सरकारले राहतको व्यवस्था गर्नुपर्ने बताएका छन् ।

तथ्याँक सँकलनको नाममा महिनौ लगाएर किसानलाई झन मार्कामा पार्ने गरी काम नगरी स्थानीय सरकारको सहयोगमा किसानहरुको क्षतिपूर्ति उपलब्ध गराएर हतोत्साहित मानसिकताबाट मुक्ति दिन तीनै सरकारसँग आग्रह गरेका छन् ।

नेता साहका अनुसार, किसानहरु अहिले पीडामा छन् । उनीहरु हतोत्साहित भएको महसुस गरिएको छ । यस्तो बेलामा सरकारले उचीत कदम चालेर उनीहरुलाई प्रोत्साहन गर्न सकिने बताए ।

५ दिन लगातार बर्षाको कारण देशैभरि धानबालीमा व्यापक क्षति पुगेको हो ।